Ein urovekkande parallell
Torbjørn Kaarbø, tidlegare leiar ved Hardanger Fartøyvernsenter og vara i Fosse-Stiftinga
Det er no 40 år sidan Stiftinga Hardangerjakt vart etablert, forløparen til Hardanger Fartøyvernsenter. Eg var prosjektleiar for nyskapinga, seinare dagleg leiar gjennom 16 år.
Ved oppstart av prosjektet møtte me sterk motbør på heimebane. Rådmannen, ordførar og fleirtalet i heradsstyret synte sterk motvilje mot stiftinga og avviste vidare kommunal støtte til prosjektet. Samtidig skreiv Hordaland Folkeblad: «Mathilde ut på djupt vatn». Med slik massiv motgang på heimebane sette den heile prosjektet i fare. Eit viktig pluss for oss var at fylkeskommunen hadde gjort positivt vedtak.
Parallellen fram til stoda for Stiftinga Jon Fosse i januar 2025 er påfallande. Den ideelle stiftinga som er heilt dugnadsbasert, er no i startgropa med å etablera eit Jon Fosse-senter i Strandebarm. Prosjektet har fått samrøystes positivt vedtak i Vestland fylkeskommune om lokalisering på Tangerås og kr 500 000 til arbeidet.
Men på heimebane møter prosjektet sterk motstand, med rådmannen si innstilling til heradsstyret, som stikk kjeppar i hjula for stiftinga.
Lokalavisa følgjer opp med negative oppslag som «Stiftinga avskilta i arbeidet med skuletomt: – Uheldig for omdømet» og «Politikarar vil trø inn bremsen for Fosse-senter». I tillegg kjem lesarinnlegg som «Jon Fosse-senter på ville vegar?».
Omverda følgjer med på kva som skjer i Kvam. Dersom ein ikkje kan syne til solid støtte i vertskommunen, vert oddsen i arbeidet mot offentlege og private bidragsytarar vesentleg svekt.
For Hardanger Fartøyvernsenter skapte den lokale motstanden at me vart seinka i utvikling dei første åra. Me måtte «gå over elva etter vatn», men med sterk innsats lukkast me i arbeidet mot sentrale styresmakter.
Per i dag har senteret over 40 årsverk og er Nordens største maritim-historiske senter.
Dersom rådmannens framlegg til vedtak får fleirtal i heradsstyret, er Fosse-Stiftinga i ein vanskeleg situasjon, parallell til den Stiftinga Hardangerjakt møtte i startfasen. Dei to prosjekta er særs ulike, men syner båe stort potensial på kvar sitt felt.
