Kommentar frå Fosse-Stiftinga til innspela i HF den siste tida
Fosse-Stiftinga
Fosse-Stiftinga (FS) har vorte sterkt kritisert i Hordaland Folkeblad siste veka. Først ved redaktøren sin artikkel under overskrifta «Vil avskilta stiftinga i arbeidet med skuletomta: – Uheldig for omdømet». Deretter innlegg av Lars Djupevåg med tittelen «Eit Jon Fosse-senter på ville vegar?». Innhaldet i den redaksjonelle artikkelen er tilbakevist punkt for punkt i skriv til heradsstyret frå FS. Konklusjonen er at alle innvendingane frå rådmannen alt er utgreidde og treng ikkje ny utgreiing over fleire år. FS og fylkesutvalet i Vestland har gått inn for eit hovudprosjekt på maks eit år. Slik sparer me tid og offentlege pengar. Stiftinga har gjennom sitt arbeid i 13 år vurdert 7 ulike framlegg til lokalisering av senteret. Konklusjonen er at skuletomta på Tangerås er den aller beste og einaste realistiske.
Etter grundige undersøkingar er det klårt at det vert billegare å sanera eksisterande bygningsmasse kontra å restaurera denne. Planen no er difor å byggja eit nytt Jon Fosse-senter på den flotte tomta, basert på behova eit slikt senter har. Vår gode sponsor Trond Mohn vil ta alle kostnadane med overføring av eigedomen til FS. Tida er difor inne for å få eit vedtak i vertskommunen Kvam som stør opp under lokalisering og samfinansiering av hovudprosjektet med fylke og stat.
Avisinnspela syner lite respekt for den mangeårige innsatsen i utforming av Tangerås-alternativet som FS har stått for. Ved sanering og nybygg kan senteret tilpassast det romprogrammet ein har behov for, til publikumsmottak, visningsrom, teatersal, biletspel, utstillingar etc. Det myldrar av idear til kva senteret kan innehalde, men det må kome fram gjennom hovudprosjektet som snart skal starta. Det FS treng no, er ei samfinansiering mellom Kvam herad, Vestland fylke og staten. Målet er å finansiere ei leiarstilling til hovudprosjektet og ein formidlingsansvarleg til å ta seg av Fossehuset og barndomsheimen Myra. Vestland fylke har alt løyvt kr 500 000 til føremålet, og me ventar svar frå Kulturdepartementet om få månader.
Det vil vera eit stort steg vidare for Jon Fosse-senteret i Strandebarm at me får desse ressursane på plass. Når det gjeld samarbeidspartnarar for framtidig drift, er me i dialog med Hardanger og Voss museum. Eit første møte med HVM er alt gjennomført. Fosse-Stiftinga arbeider med stor entusiasme for eit verdig og solid senter for nobelprisvinnaren i heimbygda Strandebarm.
Stiftinga let seg korkje «avskilta» eller vingeklippa.