Øystein førte balkongmusikken til Kvam
Øystein Mongstad song og spela gitar utanfor huset på Norheim torsdag ettermiddag for eit Youtube-opptak, akkurat slik mange syng og spelar frå balkongane i Italia.
Mongstad er studieinspektør ved Framnes kristne vidaregåande skule.Det var lærar og informasjonsarbeidar på same skule, Magnus Hisdal, som utfordra Mongstad til å opptre. Tekst og melodi henta Mongstad frå Britney Spears, med Baby One More Time.
– Flott publikum
Oppmøtet var ikkje stort – åtte–ti kom forbi. På Youtube same kvelden vart innslaget meir populært. Der vart det 341 visingar på under eitt døger. Teknisk ansvarleg Hisdal vonar på 1.000 visingar på ei veke.Ideen kom då Hisdal skulle laga til den fyrste live-strøyminga til skulen på Youtube.Han trong eit kreativt innslag, og såg at i dei store byane har det vorte populært med altankonsertar. I Norheimsund er det ein framand tanke. Men Mongstad kan både spela og syngja, og tok utfordringa på strak arm.Det gjekk ganske greitt med framføringa, seier han. – Det var eit flott publikum, seier Mongstad.
Vil underhalda
Han synest oppmøtet var akseptabelt ut frå nivået på song og gitarspel. Mongstad reknar med at det er flest framneselevar som har vore inne og sett på framføringa. Youtube-kanalen rettar seg mest mot dei 263 elevane ved skulen. Men han er òg open for andre. Det er eit mål å få fleire innom no når det er koronakrise og skulen er stengd.– Me må underhalda litt, seier Mongstad. Han spela Baby One More Time fordi det er ei låt som fengjer. Det ligg ikkje så mykje anna bak. Mongstad spela igjennom songen éin gong på førehand, og måtte ikkje terpa på han. Han spelar på hobbybasis.– Eg er ingen musikar. Hisdal utfordra meg nok fordi eg ikkje hadde så enormt mykje å bidra med. Eg trur det vart ei heilt gjennomsnittleg framføring, seier inspektøren.
Utfordrar elev
Mongstad har utfordra framneselev Øystein Fure Johansen frå Bergen til å følgja opp med ei ny balkongframføring, for han kan syngja og spela litt, som mange andre på Framnes. – Men me vonar at fleire som ikkje er musikalske, òg vil bidra. Me treng litt humor og blest. Valet av songar er fritt. Så lenge dei viser seg på balkongen og ikkje gøymer seg eller syng lågt, så må dei gjera nett som dei vil, seier Mongstad.Vanlegvis er det godt sosialt samvær på Framnes, men no sit alle på kvar si tue. Youtube-tiltaket er for å få ein samlingsplass og noko som er moro.
Artig treffpunkt
– Trur du Johansen er nervøs for å opptre?– Eg håpar at det bankar litt. Me håpar at mange, også ukjende, vil høyra på. Eg trur Johansen vil levera varene, seier Mongstad.Mange elevar er tett knytte til Framnes, og det er litt stussleg å plutseleg sitja så langt vekke frå kvarandre. – Me vil prøva å laga nokre artige treffpunkt, så elevane kan ha noko felles. Me vil gjera det lystbetont og kjekt, seier Hisdal. – Me vonar Johansen tek utfordringa. Me kan sjølvsagt ikkje tvinga han, men litt mildt press må me prøva å leggja på han, seier læraren.
Tek utfordringa
Johansen har vore heime i halvanna veke på grunn av korona-epidemien. Tanken er at han òg skal laga ein altankonsert og filma han. Så vil Hisdal visa videoen på Youtube. – Du har vorte utfordra av Mongstad til å halda ein balkongkonsert – tek du opp hansken?– Ja, eg må det. Eg er ikkje nervøs, men det kom litt ut av det blå, seier Johansen.Bergensaren har ikkje avgjort kva song han skal framføra enno. – Korleis taklar du å vera heime?– Det går fint, det er mange som har det verre, så eg kan ikkje klaga. Det er sjølvsagt kjipt å ikkje få vera på «neset». Johansen satsar på å slå Mongstad, og kanskje dobla hans tal på visingar. Han har ein balkong han kan syngja frå, men han veit ikkje om det er så mange ute og går.– Du har sikkert sett at mange spelar på balkongar i Italia?– Ja, det er stilig, seier Johansen.
Håkon Norheimnorheim@hf.no
