Meir Elvis med Kvammakoret
I fjor haust hadde Kvammakoret konsert med Elvis Presley-songar. Opplevinga gav meirsmak, så torsdag inviterer koret til ny Elvis-konsert.
Den førre konserten var på Kvam ungdomsskule i Øystese. Denne gongen vert konserten på Norheimsund skule.– Mange av songane vert dei same som sist, men samstundes har me utvida repertoaret og øvd inn fleire nye nummer, fortel styreleiar i Kvammakoret, Joar Aalvik.Repertoaret er ikkje berre utvida. Lista er også flytta eit hakk opp. – Denne gongen er det fleire songar med høgt tempo. Då vert det mange ord som skal ut på kort tid. Dette er krevjande for songarane, særleg med tanke på at songane er på engelsk, seier Aalvik.
– Klassikarar på rekkje og rad
Nils Ove Børve skal vera konferansier, samstundes som han er ein av songarane. Han omtalar seg sjølv som ein prosjektbasert kormedlem, som er med når det passar og når koret skal framføra noko han tykkjer er interessant.Konferansieren og styreleiaren lovar ein konsert med velkjende Elvis-klassikarar på rekkje og rad. Her vert det både Blue Suede Shoes, Jailhouse Rock, Hound dog, Can’t Help Falling in Love, Love Me Tender, Always on My Mind, A Little Less Conversation og mange fleire.
– Litt meir rocka
Aalvik meiner musikken til Elvis fengjer på tvers av generasjonane.– Elvis samlar både dei som vaks opp med musikken hans og yngre som likar klassisk rock. Det er ei viktig årsak til at me har valt å laga ny konsert med Elvis etter så kort tid, seier han.Konserten vert ikkje siste gongen Kvammakoret har rock på repertoaret.– Håpet er at Kvammakoret skal verta litt meir rocka. Me ønskjer oss fleire yngre medlemer. Skal me få det, må me velja eit repertoar som får yngre generasjonar til å forstå at kormusikk er stilig og at det å syngja i kor er kjekt, seier Aalvik.Koret er allereie i gang med å planleggja ein konsert med populærmusikk frå 80-talet. Øvingane skal byrja til hausten, og planen er at konserten kjem neste vår.
Entusiastisk oppvarming
Med seg på scena har Kvammakoret eit lite band som består av Jan Tore Ness på slagverk, Petter Sæverud på bass og Margrete Lid Kjosås på piano.Koret har også fått Elvis-entusiast Bjarte ”Elvis” Haugland til å varma opp før konserten.– Han er ihuga Elvis-fan og skal ha sitt eige Elvis-show før koret entrar scena. Eg har ikkje sett han opptre sjølv, men har høyrt rykte om at dette vert bra, fortel Børve.
