Varslar einvegskøyrd veg
Bergen–Voss skapar trafikale ulemper laurdag.
Sykkelrittet vert skipa til for 46. gong. Ettersom syklistane tek turen via Kvam, får det fylgjer for lokaltrafikken.
Det mest inngripande tiltaket er at fylkesveg 7 vert einvegskøyrd i 3,5 timar laurdag føremiddag, frå klokka 08 til 11.30. Berre trafikken frå Kvam mot Samnanger går som normalt i denne perioden. Motsett veg må bilistane velja alternative ruter, opplyser dagleg leiar Nils Olaf Solberg i arrangør Bergen Cykleklubb i ei pressemelding.
Husstandar på strekkja Garnes–Granvin skal ha fått varsel om stenginga, som i tillegg vert grundig varsla på skilt.
Målet er å minimera trafikken når syklistane syklar over Kvamskogen. Bussar og utrykkingskøyretøy får vel å merka passera.
Ifylgje deltakarlista var vel 1.000 syklistar påmelde fredag føremiddag. Dei skal sykla anten strekninga Bergen–Voss eller Norheimsund–Voss. Fire i Hardanger Sykkelklubb stod på deltakarlista.
