Lågare fartsgrense i Vikedal
Statens vegvesen har vedteke å setja ned fartsgrensa frå 60 til 40 kilometer i timen på ei strekkje på 510 meter i Vikedal.
Det skjer på oppmoding frå Vestland fylkeskommune. Det kjem dessutan to nye fartshumpar i området.
Skiltplanen vart send på høyring til politiet og Kvam herad. Svaret frå heradet vart sendt etter høyringsfristen.
Heradet meiner at ei 40-sone er fornuftig i sentrum i Ålvik, men meiner at ein mot Vikedal heller burde hatt ei lengre strekkje med 50 kilometer i timen i staden for ei kort strekkje med 40-sone i Vikedal. Ei slik fartsgrensesetjing vil gje betre trafikkflyt, meiner heradet.
Vegvesenet har sidan hatt dialog med fylkeskommunen. Sistnemnde viser til at strekkja frå Vikedal til Ålvik ikkje kvalifiserer til 50-grense etter gjeldande fartsgrensekriterium. Mellom Vikedal og Ålvik har ikkje vegen den bygningsmassen og aktiviteten som ein ser langs vegen i Vikedal, meiner fylkeskommunen.
– Etter gjeldande fartsgrensekriterium finn me ikkje grunnlag for å oppretta ei utvida 50-kilometersone på heile strekninga mellom Vikedal og Ålvik, skriv vegvesenet.
Vegvesenet er samd med Vestland fylkeskommune i at ei kort sone med 40 kilometer i timen og fartsdempande tiltak er den tryggaste løysinga.
40-sona med fartsdempande tiltak skal sikra dei mjuke trafikantane som må gå langs vegen på ei strekkje som av og til er smal og som ikkje har andre alternativ for gåande og syklande.
– Fartsgrensesona bør vurderast på nytt når det seinare vert oppretta eit langsgåande tilbod for gåande og syklande, skriv vegvesenet i vedtaksbrevet.
