«Børning» i Øystese: – Hadde mista førarkortet på staden

Klokka 23.06 natt til sundag fekk politiet melding om råkøyring på Notaneset i Øystese.

Ein nabo fanga hendinga på film. Han fortel at ein stor gjeng – over hundre personar, hevdar han – var samla på plassen. Dei hadde sperra vegen ned mot Notanes med bilar.

– Det tok heilt av, så eg køyrde bort og filma dette. Panikken tok dei og dei forsvann, fortel han.

Han har sendt videoen til politiet.

Politiet i Kvam, Samnanger og Tysnes skriv på Facebook at politipatruljen var på Kvamskogen då meldinga kom. Politiet kom til Øystese 23.25. Då var det stille i bygda, men politiet trefte på 22 bilar ved hotellet i Øystese. Dei stod parkerte midt på plassen, medan mange unge personar stod ved bilane. Alle bilane og personane kom frå Bergen og Bjørnafjorden kommune.

Politiet trur sjåførane har tilknyting til ei gruppe som organiserer stygg køyring via sosiale medium. Politiet kjenner til tilsvarande episodar andre stader.

– Me er glade for at lokale ungdommar ikkje var dei skuldige, og at dei heller ikkje blanda seg med motorgjengen frå Bergen eller tøffa seg tilsvarande. Me vonar at lokale ungdommar vel å ta avstand frå slik framferd, skriv politiet.

Hadde mista lappen

Politiet slår fast at ein utan tvil hadde kverrsett førarkorta til sjåførane om dei hadde vorte tekne på fersk gjerning. Politiet viser både til vegtrafikklova og politilova som gjeld nattero etter klokka 23.

Ingen av personane politiet snakka med, vedkjende seg køyringa.

Politiet takkar dei som melde frå om hendinga, og ber om dokumentasjon, til dømes film.

– Me skjønar at det kan vera belastande for privatpersonar å stå fram med private filmopptak, men politiet er nokre gonger avhengig av eit samarbeid og eit publikum som torer å stå fram i ei straffesak, skriv politiet.

– Meld frå!

Politioverbetjent Jarle Sjo Myklebust understrekar overfor HF at politiet ynskjer at folk melder frå dersom dei ser uvitig køyring, slik at det er mogeleg for politiet å ta syndarane på fersken. Eit alternativ er altså bilete eller film som viser registreringsnummer eller personar tydeleg nok til at det står seg som prov.

Myklebust fryktar at folk skal verta så vane med køyringa at dei sluttar med å melda frå. Dess fleire som melder frå, dess enklare vert det å prioritera sakene, påpeikar han.