Ynskjer å rekruttera nye badevakter
Jondal Idrettslag treng fleire badevakter i symjehallen, og har fått kommunalt medhald i eit nytt lokkemiddel.
Jondal har fått oppgradert symjehall, og hallen opnar att kvart år etter haustferien. Bygda har i 40 år hatt tilbod om offentleg bading. Idrettslaget har teke ansvar for badinga på laurdagane, mot at laget får ein del av billettinntektene frå hallen.
Badevaktene har vore trufaste i mange år, men tek til å verta leie, opplyser idrettslagsleiar Gudmund Toreid i eit brev til Ullensvang kommune. Laget meiner difor at det må verta meir attraktivt å verta badevakt.
Ein idé om å gje vaktene og familiane deira gratis inngang på laurdagane, er forkasta av di ordninga kan få færre til å kjøpa sesongkort og det kan verta stappfullt på laurdagane.
Laget føreslår i staden at dei frivillige badevaktene får kjøpa familiesesongkort til halv pris, eventuelt vanleg sesongkort til halv pris for dei som er single. Inntekta frå sal av sesongkort kan verta redusert, men det kan verta kompensert ved at fleire kjøper sesongkort, trur Toreid. Han opplyser til HF at kommunen har gjeve grønt lys for ordninga, og at tilbodet allereie er marknadsført.
Han påpeikar at ordninga vil føra til at kring tjue personar med både livredningskurs og interesse for symjing vil verta flittigare bassengbrukarar på alle dei tre opningsdagane kvar veke.
– Dette vil koma alle brukarane av symjehallen til gode, skriv han.
Idrettslaget sende nyleg ein person på livredningsinstruktørkurs i Oslo. Fyrst når vedkomande har kursa andre badevakter, kan laurdagsbadinga koma i gang etter haustferien. Toreid fortel at laget vonar å gjennomføra kurset komande helg.
Badevaktene arbeider i par, og dei fleste må stilla opp to laurdagar i halvåret, opplyser Toreid.
