Vonar at god oppkøyring kan gje VM-billett

– Oppkøyringa i år har vore mykje betre enn tidlegare sesongar, seier Børve.

Klar for revansje

Når ho ser attende på korleis treningssesongen har vore så langt i år, er det lite ho tenkjer at ho burde ha gjort annleis. Skiskyttaren fortel at ho har hatt kontinuitet i treninga sidan oppstarten i mai, og at kroppen spelar på lag.

Oppladinga i år står i stor kontrast til fjoråret. Då vart store delar av både trenings- og konkurransesesongen prega av ein kneskade.

– Fjoråret var tøft. Eg fekk ikkje gjort det eg var motivert for å gjera, fortel skiskyttaren.

Ho vonar at motgangen i fjor har gjort henne til ein endå betre skiskyttar. Ein kan læra mykje når det buttar litt imot, understrekar Børve. Ifylgje henne er det ein revansjelysten kvemming som vil stilla på startstreken på Sjusjøen 12. november.

– Eg må ikkje akkurat leita etter motivasjon. Eg har veldig lyst til å visa kva eg er god for, seier Børve.

Skiskyttaren frå Kvam har allereie fått målt krefter mot konkurrentane ved eit par høve denne sesongen, og pila peikar i rett retning, konstaterer ho. På Blink-festivalen i Sandnes i august kom ho på 2.-plass. Nokre veker seinare tok ho sylv i klassen K20–22 i NM i rulleskiskyting på Gautefall.

– Du er ikkje redd for å nå formtoppen for tidleg?

– Nei, eg er trygg på planen eg har lagt. At eg er i god form no, treng ikkje vera eit negativt teikn for sesongen som ventar, seier Børve.

Kvalitet framføre kvantitet

Ho har lagt bak seg fleire månader med langturar og treningsøkter i dei lågare intensitetssonene. No ventar kortaren, hardare økter fram mot sesongstart.

– Det vil verta meir og meir pusting og pesing, men det er godt med nokre skikkelege utblåsingar, fortel skiskyttaren.

22-åringen brukar mykje tid på idretten. I tillegg til at det vert mange timar med fysisk arbeid, går det ein del timar til planlegging av øktene. Desse tek Børve aktivt del i. Ifylgje henne varierer det frå utøvar til utøvar kor mykje ein tek del i treningsplanlegginga. Sjølv er ho nyfiken og glad i kontroll, og brukar ein del tid på å diskutera trening med trenaren. Kvemmingen omtalar trenaren som ein god sparring-partnar. Han gjev henne rom for å vera sjølvstendig, men som også set grenser.

Tal på treningstimar varierer mykje i løpet av sesongen. Mange faktorar spelar inn, forklarar skiskyttaren. Ho er mest oppteken av kvalitet framføre kvantitet. Ifylgje Børve er ho ikkje blant dei utøvarane som har flest treningstimar, men ho lèt seg ikkje stressa.

– Det er viktig å hugsa på at ein skal ta omsyn til dagsforma og lytta til kroppen, fortel kvemmingen.

Fleire ballar i lufta

Som toppidrettsutøvar set ein seg både kort- og langsiktige mål. Medan målet for sesongen er å få delta i junior-VM i Kasakhstan i mars neste år, er det langsiktige målet ein deltakarbillett i OL i Italia i 2026. Sistnemnde har vore eit mål i fleire år. For å koma dit, skal mykje klaffa. Ein lyt prestera jamt godt, jobba hardt over tid, og viktigast av alt – ha trua på at målet er oppnåeleg, understrekar Børve.

Kvemmingen er busett på Lillehammer, der ho er ein del av Team «To Be Named», tidlegare Team Mesterbakeren. På Austlandet prøver ho å finna balansen i eit liv som både student og toppidrettsutøvar. I haust byrja ho på eit nettbasert byggingeniørstudium på NTNU i Gjøvik. Studiet er morosamt, men krevjande, tykkjer Børve.

– Eg må finna ei ordning der det eine ikkje går ut over det andre. Det ordnar seg alltid til slutt, seier ho.

Årets sesong er hennar siste som junior. Sjølv om ho har sikta seg inn på junior-VM i mars, er ho oppteken av å gå å flest mogleg gode løp gjennom heile sesongen. Uttaksrenna til meisterskapen vert truleg dei viktigaste for kvemmingen, som har planen klar.

– Det er om å gjera å unngå å tenkja: «Det er no det gjeld. No skal eg koma meg til VM.» Eg må heller senka skuldrene, fokusera på jobben eg skal gjera og syna kva eg kan, seier Børve.

– Stol på treninga

Skal ein nå langt i skiskyting, er ein avhengig av eit godt støtteapparat, slår 22-åringen fast. Ifylgje Børve kunne ho ikkje ha satsa på idretten om ho ikkje hadde hatt ein klubb, ein familie og sponsorar som støtta henne. Særleg familien spelar ei viktig rolle. Han bidreg med det han kan både på heimefronten, i treningsøkter og i konkurransar.

– Eg føler meg bortskjemd når eg veit kor mykje dei gjer for meg. Heldigvis er dei flinke til å minna meg på at det er noko dei synest er veldig kjekt å vera med på, fortel Børve.

Øystesejenta går for Kvam Langrenn- og Skiskyttarklubb, og har lagt bak seg mange treningstimar på Sjusete. Ho har mange gode minne knytte til klubben, og vonar at dei unge og lovande kvemmingane har ein god sesong i vente.

– Har du råd til lagkameratane dine?

– Dei må stola på at det dei har trena på, er godt nok. Dei må ikkje byrja å stressa eller tvila når sesongen er i gang. Tipset frå meg er: «Gjer det de har øvt på.»