Volleyballspelar vart historisk
Den første nordmannen som har spela i ein europacupfinale i volleyball, kjem frå Kvam.
Han heiter Rune Froestad Fasteland, og dei siste åra har han spela for den belgiske klubben Knack Roeselare.
Onsdag spela laget den første av to kampar i CEV-cupen i volleyball. Motstandaren var det italienske laget Modena, og kampen vart spela i Italia. Komande onsdag skal det heile avgjerast i returoppgjeret i Belgia.
Ikkje avgjort
Knack Roeselare vann bortekampen 3–0, og ein skulle kanskje tru at laget er favorittar. Slik er det ifølgje Fasteland ikkje. Modena har fleire verdsklassespelarar og gjer det godt i den italienske ligaen, som er mellom dei beste i verda.
Knack Roeselare må vinna to sett for å stikka av med sigeren samanlagt. Vinn Modena 3–1 eller 3–0, vert kampen avgjord på «golden set», som er eit avgjerande sett der ein spelar til 15 poeng.
– Modena er sterke, og bookmakerane held dei som favorittar. Likevel har me eit bra lag som har hatt god flyt dette året. Me spela bra i Italia, og eg trur me har gode moglegheiter til å vinna, seier Fasteland.
– Stort for meg
Fasteland fortel at CEV-cupen er den nest gjævaste europacupen etter Champions League. Knack Roeselare gjekk inn i CEV-cupen etter å ha vorte slått ut av Champions League.
– Å spela ein europacupfinale er stort både for meg og for klubben. Ingen av oss har gjort dette tidlegare. Eg har fått med meg at eg er den første nordmann til å spela ein europacupfinale i volleyball. Det veldig kjekt å vita at ein får litt ut av det ein held på med, seier han.
