Vil ha ungdomen med

Du kjem inn døra på Hardangerfjord Hotel og høyrer musikken gå i det flotte lokalet. Men når du går heilt inn, så ser du eit par bord i eit lunt hjørne med nokre sjakkbrett på.

Her held Kvam Sjakklubb til. Eg slo meg ned og tok ein prat og nokre parti sjakk.

Rom for fleire unge

Eg stilte kasserer Bjarne T. Bakke i Kvam Sjakklubb nokre spørsmål.

– Vonar de å sjå fleire ungdomar no som sjakk er blitt ein større idrett?

– Ja, det har ikkje vore så mange ungdomar innom enno. I dag kom det eit par, og det var veldig kjekt, seier Bakke.

Sjakk har raskt blitt ein av dei mest populære aktivitetane blant ungdomar. Chess.com, den mest brukte nettstaden for sjakk, har klatra til fyrsteplass på norske Apple App Store. Talet på aktive spelarar har auka frå sju millionar til ti millionar.

– Kva nivå må du ha for å spela sjakk her?

– Her kan du koma uansett nivå og sjølv om du aldri har rørt eit sjakkbrett før. Alle er velkomne! seier han med eit smil, seier Bakke.

Sjølve har han ei «rating» på rundt 500 på Chess.com.

– Kor mange pleier å koma på «vaksensjakken»?

– Der har det vore ganske bra frammøte. Me har lege på 8–12 – til og med oppi 14 ein gong!

– Kjem de til å arrangera turneringar?

– Me har ikkje hatt turneringar. Me har diskutert det, men det blei litt mykje organisering. Viss det kjem fleire folk, kan det bli aktuelt, men det avheng av at me har nokon som kan hjelpa til. Men det er godt mogleg at me kan få det til, seier Bakke.

Det vert årsmøte i klubben 6. februar, med og mogelegheit for eit parti sjakk etterpå.

– Nokon for alle

Sindre Van Der Linden er innom sjakklubben for fyste gong. Han begynte å spela sjakk for rundt ein månad sidan.

– Eg var spent, fordi eg tenkte det var ein gjeng som var altfor god til at eg skulle klara å ha nokon sjanse mot dei. Men det var veldig forskjellig nivå på spelarane, så det finst ein motstandar for alle.

– Korleis gjekk det? Var du nøgd med eigen innsats?

– Eg gjorde nesten reint bord – fire sigrar og eitt tap. Eg er misnøgd med tapet, men alle tabbar er ein lærdom.

– Kjem du til å ta turen igjen? Kan du anbefala dette til andre?

– Absolutt! Alle kan koma, anten for å spela, læra eller berre mingla og sjå på. Det er ein hyggjeleg gjeng, og jo fleire, jo betre.

HF gjer merksam på at journalistane er mediefagselevar på Framnes Kristne Vidaregåande Skule. Red.