Vil ha skytefrie dagar

Det ber grunneigar i Vangdalsåsen Heine Aarekol om. Han synest det er for mykje støy frå skytebanen, og har klaga til Kvam Pistolklubb, Øystese Jeger- og Fiskarlag, Hardanger Skyttarlag og Kvam herad. Forutan dei nemnde laga nyttar Hardanger Sportsskyttarklubb banen.

Skytinga går føre seg på alle vekedagar, frå tidleg morgon til sein kveld, hevdar Aarekol.

– Faste dagar

Leiar i Hardanger Skyttarlag, Arve Kolltveit, seier laget har uteskyting i Vangdalsåsen tysdag, onsdag og torsdag i sommarhalvåret. Viss det er stemne, kan ein bruka banen både laurdag og sundag. Vanlegvis er det ikkje skyting på sundagar.

— Talet på stemne som medfører bruk av helgane, er maksimalt tre–fire i løpet av eit år, seier Kolltveit.

Reguleringsplanen gjev rom for skyting kvar dag, seier han.

Tek opp spørsmålet

Kolltveit seier at spørsmålet skal takast opp i eit styremøte i laget. Det er det same svaret Aarekol har fått, seier han.

Aarekol har inntrykk av at mange privatpersonar har tilgang til banen og kan skyta også utanom organiserte treningar. Det er ikkje noko tidspunkt på kvardagen eller i helgane der ein kan planleggja ein støyfri tur i området, meiner han.

Kolltveit seier han ikkje kan svara for dei andre laga, men Hardanger Skyttarlag gjev ikkje privatpersonar løyve til å skyta åleine. Alt føregår i organiserte former i laget, seier Kolltveit.

Det manglar ei samkøyring av skytetidene. Det er uheldig for folk, dyr og fugleliv, meiner Aarekol.

– Lyden ber langt

Han opplyser at lyden ber langt og kan høyrast i områda frå Heradstveit, til Aksnes og Vikøy og i tilhøyrande tur- og friluftsområde.

— Dette er sjenerande og plagsamt for all turaktivitet og for uteaktivitet rundt busetnaden. Området er mykje brukt av både lokale innbyggjarar og hytteeigarar, skriv Aarekol.

Spesielt i perioden for hjortejakt, september til desember, er støyen øydeleggjande for jaktmoglegheitene. Brukarar av banen må ta omsyn til dei som brukar området rundt, meiner grunneigaren.

— For dei som høyrer lyd frå banen heilt til eigen bustad er det truleg ekstra plagsamt, skriv han.

– Under ti timar

Kolltveit seier spørsmålet òg skal takast opp i samarbeidsutvalet for skytebaneanlegget. Det er fire aktørar i området som skyt. Ein må samkøyra seg litt, seier han.

— Kor mange timar er det skyting i veka?

— Det er vanskeleg å seia. Me har skyting tre dagar i veka, to–tre timar kvar dag. Det vil seia at det er skyting under ti timar i veka. Me har ikkje skyting før klokka 16. Det er restriksjonar me har pålagt oss sjølve, ut over dei som ligg i reguleringsplanen. Me meiner me har prøvd å tilpassa oss, seier Kolltveit.

— Har de noka form for støydemping?

— Standplassane er støydempa. Det er òg bygd vollar mellom standplass og skivene. Heile anlegget er naturlegvis bygd innanfor vollar, og i tråd med gjeldande krav til støy og støydemping.

— Under hjortejakta har Hardanger Skyttarlag normalt inga skyting, seier Kolltveit.

Utandørssesongen tek slutt i starten av september.

Skyt faste dagar

Kvam Pistolklubb opplyser på heimesida at klubben har fast treningsdag på tysdagar. Frå mai til september skyt klubben utandørs i Vangdalsåsen frå klokka 18 til det vert mørkt.

Andor Helgheim i Hardanger Sportsskyttarklubb seier at medlemene skyt berre på ettermiddagen tysdagar og torsdagar, og så er det stemne nokre helgar.

Det er reglar for kva tid stemne skal byrja.

— Aarekol må sjølvsagt ha lov å meina at det er mykje støy. Men det siste året har klubben skote ekstremt lite i Vangdalsåsen.

Sportsskyttarklubben har nokre gonger skyting for alle, andre gonger for dei som trenar mest. Det er lov å skyta elles i veka òg, men ikkje etter klokka 21, seier Helgheim.

Det er utarbeidd retningsliner for kva tid det er greitt å skyta der.

Jaktgevær bråkar mest

– Viss eg skal uttala meg på vegner av sportsklubben eg er med i, så har ikkje me løyst eitt skot på den banen enno. Me skal skyta med hagle der. Eg ser fram til at banen skal verta mykje brukt. Det er ein allsidig og enkel sport, kjekk for både vaksne og born. Me er ikkje utan vidare interesserte i at skytetidene skal skrenkast inn ytterlegare, seier Helgheim.

— Me er ikkje så mange i klubben. Det er så vidt det er eit tosifra tal medlemer, på grunn av at me ikkje har fått byrja å skyta enno. Det varierer svært mykje kor mykje det støyar, alt etter kva våpen ein skyt med, vil eg tru. Både hagle og 22-kaliberpistol vil støya mindre enn dei grovkalibra våpena.

Når ein skyt med jaktgevær, bråkar det meir enn noko anna, seier Helgheim.

– Er innanfor

Leiar for samfunn, kultur og næring i Kvam herad, Jon Nedkvitne, opplyser til HF at heile tanken bak samlokaliseringa av skytebanane i Vangdalsåsen var å skapa eit attraktivt anlegg for heile heradet.

– Målet var aktivitet og moglegheiter for flest mogleg disiplinar i eit geografisk avgrensa område, men også innafor gjeldande støykrav, skriv Nedkvitne.

– Banen og dei ulike aktivitetane skal vera plasserte slik at støyen er innanfor støykrava, spesielt med tanke på fast busetnad. Det gjeld både Vangdal og Heradstveit, skriv Nedkvitne.