– Vil freista folk med frisbeegolf
Då Eivind Ringheim Århus frå Ålvik var på ferie, vart han biten av frisbeegolfbasillen. No står resten av industribygda i fare for det same.
Den populære sporten går kort fortalt ut på å treffa med frisbeen – disken – oppi korger som er sette opp i god avstand til kvarandre. Laurdag møttest ein gjeng på vel 30 vaksne og born til dugnad for å framskunda opninga.
I solskinet vart skog og skrot rydda, utkastrampar monterte og betongelement gravne ned – alt akkompagnert med fuglekvitter og elvesus.
– Ingenting er tilfeldig, seier Øystein Gangdal om det flotte vêret.
– Me har kontaktar.
Om alt går etter planen, er bana klar innan 17. mai, fortel Århus.
Kvifor ikkje?
Århus vart som sagt kjend med sporten på Austlandet, nærare sagt på ferie med sambuaren i Fredrikstad. Nokon i familien hennar hadde prøvt frisbeegolf, og anbefalte å testa det. Sporten gav meirsmak, og resten av ferien vart styrt av kor det var andre baner å prøva.
Ålvikaren har flytta frå industribygda, men er mykje på besøk og har sakna å ha noko meir å gjera på når han er heimom. Slik kom ideen.
– Frisbee kostar lite å byrja med, og naturen var der. Det var ingen andre baner i nærleiken, så det var verdt å sjekka moglegheita. Eg tenkte «kvifor ikkje?», fortel initiativtakaren.
Området som er teke i bruk, er eigt av Elkem Bjølvefossen. Planen er at Ålvik Idrettslag skal drifta bana. Det vil seia at laget vert ansvarleg for å gjera naudsynte utbetringar, laga arrangement og marknadsføra bana, for å nemna noko.
– Veldig stas
I alt har idrettslaget fått inn nær 500.000 kroner i stønad til realisering av banen. Det er veldig stas, og noko overveldande, seier Camilla Gangdal. Gangdal er styreleiar i Ålvik Idrettslag. Idrettslaget er enormt takknemleg, seier ho.
– Eg trur det betyr at dei som deler ut stønad, ser at me har eit godt prosjekt, og at dei får mykje att for pengane på grunn av enormt mykje dugnadsinnsats, seier Gangdal.
Samstundes håpar ho at det syner at gjevarane er trygge på at tiltak som vert sette i verk i regi av idrettslaget, vert realiserte. Sjølv er ho ikkje meir kjend med frisbeegolf enn dei fleste – ho har kasta litt på ein «bensinstasjonsfrisbee» som lita. Planen er å testa det, og ho trur ho kjem til å lika sporten.
No er krattskog rydda, og ei ny bru over Dalaelva og ein grusveg er på plass. Det er eit veldig fint og lunt område med god atmosfære, meiner styreleiar Gangdal.
– Me håpar folk vil ta det i bruk både med og utan frisbee, seier ho.
– Fekk att for innsatsen
Harald Torheim er mellom dei som stilte på dugnad i finvêret. Han grev hol til eit betongelement når HF møter han. Det er til ei informasjonstavle, opplyser han.
Torheim vaks opp like i nærleiken, så han er godt kjend i område. Som gutunge vart det mykje leik i skogen og langs elva, fortel han.
– Det var her me leika. Då me var ferdige på skulen, var det opp her for å herja. Eg hugsar me stal røykt makrell og kalde poteter av foreldra mine og kosa oss, seier Torheim.
No kan arbeidet hans skapa barndomsminne for andre. Og arbeid har det vore mykje av. Torheim byrja med skogrydding allereie i september. Sidan har han stått på så lenge det har vore snøfritt og opplett. Det har vorte nokre timar. Stort sett har han vore aleine. Det har vore heilt supert, synest han.
– Eg har kosa meg. Fått frisk luft og mosjon. Eg har gått ned ti kilo.
– Og mykje gratis ved, legg han til.
– Har du kjøpt deg disk no, då?
– Ja, eg har prøvt lite grann. Men så fann eg ein i elva, som var Eivind (Århus, journ. merknad) sin. Det var noko anna. På korg nummer éin brukte eg berre to kast, seier han.
Nok ei bane i kjømda
Sporten er tydelegvis i vinden. Ålvik er nemleg ikkje aleine om å laga til bane. Sett vekk frå nokre korger på Framnes Kristne Vidaregåande Skule og Kvam ungdomsskule, var Jondal fyrst ute med å etablera bane i området. Ho kom på plass sommaren 2021. Bana ligg i friluftsområdet ved Djupaviki nedanfor bustadfeltet i Sætveithagen.
I fjor haust byrja også arbeidet med ei bane i Tolomarka i Norheimsund. Kvam herad har signert ein avtale med Kvam frisbeegolf om bruk av fire tomter. Styreleiar Hans Erik Sæbø seier at det er mykje aktivitet på den komande bana. Fire eldsjeler er i sving. Det vert for tida rydda i området og gjort klart til å byggja utkastrampar, fortel han. Ni korger er kjøpte inn, og tre av dei er allereie på plass.
Så snart området er rydda og klargjort, skal resten av korgene i jorda og rampane ferdigstillast. Målet er å vera klar i løpet av sesongen. Målet til neste år er ni hol til.
– Mykje arbeid står att, men me står på og vonar at bana vert mykje brukt når ho er klar, seier Sæbø.
