Øystese Grendautval bør få 40.000 kroner i tilskot til etablering av nytt stupetårn på Stronde, meiner rådmannen i Kvam.
Utvalet har søkt om 60.000 kroner frå kraftfondet til prosjektet, som er kostnadsrekna til 850.000 kroner.
Rådmannen meiner tiltaket kan vera eit supplement til bading i sentrum og ein del av stadutviklinga i Øystese. Det gamle stupetårnet var svært mykje brukt på 50- og 60-talet. Grendeutvalet ynskjer å få dette tilbodet tilbake og gjera det tilgjengeleg for alle.
Det er gjort ein del dugnadsarbeid, mellom anna med skogrydding. Ein sti på 100 meter vil gå til stupetårnet og vil få gjerde. Stien er den største utgiftsposten, til i alt 550.000 kroner. Området er regulert til offentleg park og friområde. Det er henta inn prisar og planlagt bygging av tårnet, men det kan ikkje bestillast før finansieringa er fullført, opplyser grendeutvalet.
Prosjektet har fått stønad frå fleire og skal søkja om meir. Utvalet reknar med dugnadsarbeid til 150.000 kroner.
Saka vert handsama i formannskapet 2. november og avgjord av heradsstyret 8. november.
