– Vil absolutt tilrå skiskyting
Skiskyttarstadionet på Sjusete nærmar seg ferdigstilling.
Far til skiskyttartalentet Hanna Børve frå Øystese, Geir Børve, arbeider på taket på husa på standplass på Sjusete når HF er innom.
Han har arbeidd for Hardingar AS i fem–seks år, og gjer løna arbeid, men òg jobba dugnad på anlegget. Han vil gjerne gje noko tilbake til klubben, som støttar godt opp om utøvarane.
– Det er viktig å få anlegget opp og gå for rekrutteringa, og ikkje minst for å få dei som har byrja, til å halda fram, seier Børve.
Har fått fleire skiver
Det står att litt småplukk med måling og rydding, og å få opp lysmaster. Skyteskivene vart sette opp på dugnad i 2012. Då låg anlegget på andre sida av elva og hadde ti skiver. Etter at banen kom dit han er i dag, har han fått 22 skiver. Til nasjonale renn treng ein 30 skiver.
Det har vore av og på med dugnad. Kring 30 personar har vore med på dugnaden. Det vert ofte dei same som går att, fortel Børve.
Sjusete kan snart hysa landsdelsmeisterskapen i skiskyting. Elles er det ein cup som går gjennom vinteren, Gla´laks-cupen i skiskyting. I denne er det planlagt to renn på Sjusete i vinter. Smitteverntiltak gjer at det er knytt uvisse til arrangementa. Vanlegvis arrangerer ein òg to krinsmeisterskapar i skiskyting årleg.
Involverer foreldra
– Kan du tilrå andre å driva med skiskyting?
– Ja, det vil eg absolutt anbefala. Det er ein veldig fin idrett å driva i lag med borna. Dei må ha vaksne med seg fram til dei er i alle fall 16 år på grunn av våpenhandtering. Slik får dei vaksne ein fot innanfor og får mykje tid saman med borna. Dei får oppleva trening og konkurransar. Det er noko heilt anna enn å berre sleppa borna av på fotballbanen og henta dei att. Du vert involvert heile tida.
Skiskyttarforbundet tilrår klubbane å halda våpen i alle fall til borna er 12 år gamle. Kvam Langrenn- og skiskyttarklubb (KLSK) har jamt og trutt kjøpt inn våpen. Børve trur ikkje det er mange klubbar som har meir våpen og utstyr til utøvarane enn KLSK.
– Det treng ikkje kosta så mykje for dei. Ski og slikt må dei kosta sjølve, men det er ikkje nødvendig å hoppa så høgt i starten, seier Børve.
Byrjar tidleg
Borna byrjar med skiskyting frå dei er åtte år gamle. Både foreldre og born må gjennomføra ein skiskyttarskule der dei lærer om våpenhandtering og -tryggleik for å få vera med på treningar og stilla på renn.
Dei byrjar med å skyta på ein blink som er 11 centimeter i diameter. I 11–12-årsalderen byrjar dei skyta på ein blink som er 4,5 centimeter stor. Då skyt dei med såkalla anlegg, altså støtte under våpenet. Det tek ein vekk i 13-årsalderen, så då må dei håpefulle halda heile våpenet sjølv. Når dei er 17, byrjar dei med ståande skyting. Det er 20–25 meir eller mindre aktive skiskyttarar i klubben, fortel Børve.
Hanna Børve, dottera til Geir, er ein av skiskyttarane frå Kvam som har nådd lengst. Nyleg fekk ho tildelt 40.000 kroner i fylkeskommunalt utviklingsstipend.
Også Malin Auganæs Bergtun har gjort det godt, med ein 6.-plass i noregscupen 29. november. Ho trenar med ein klubb i Trondheim, men representerer framleis Kvam.
