Viktig siger for blåtrøyene
Herrelaget til Øystese sikra tre poeng på heimebane fredag. Sigeren held liv i håpet om å halda på ein plass i 4. divisjon neste år.
Stillinga vart 5–0 til Øystese då laget i 4. divisjon møtte for lengst fortapa Bergen Nord på Øystese stadion. Dei 3 poenga syrgjer for at kvemmingane vil kunna halda på plassen i divisjonen neste sesong.
– For vår del var kampen veldig viktig. Det var på ein måte siste kapittel for Øystese, samstundes som det også vil ha noko å seia for det fyrste kapittel for samarbeidslaget, fortel Øystese-kaptein Anders Næs.
Godt frammøte
Kampen var den siste på heimebane i sesongen. Ifylgje Næs tok svært mange turen til stadion for å få med seg oppgjeret. Kapteinen fortel om publikummarar som song og heia gjennom heile kampen.
– Det var ein surrealistisk kamp å spela. Det var rett og slett skikkeleg kult å vera Øystese-spelar, seier Næs.
Fatah Ahmed Abdulle førte heimelaget opp i leiinga i 1. omgang. Seinare sette Anders Botnen 2–0-målet på straffe. Marcus Dalseide syrgde for at blåtrøyene gjekk til pause med ei 3–0-leiing.
Dalseide starta 2. omgang slik han avslutta fyrste, og skåra det 4. målet for heimelaget. Sebastien Kyemo førte blåtrøyene opp i ei 5–0-leiing, som også vart sluttresultatet.
– Me hadde full kontroll heile vegen, konstaterer Næs.
Kom frå nabobygda
I tillegg til at mange Øystese-supporterar var til stades, var også ein del Norheimsund-tilhengjarar på plass. Øystese-kapteinen fortel at naboklubben synte stort engasjement både før og under kampen.
– Dei heia Øystese fram og har vore veldig «på». Dei to laga våre har allereie byrja å samarbeida, og det er veldig moro, seier han.
Laurdag kunne samarbeidslaget til Øystese og Norheimsund ha vore sikra ein plass i 4. divisjon neste år dersom Arna-Bjørnar hadde slege Fana 2. Kampen enda 0–2 til Fana 2. Dimed lyt kvemmingane kjempa vidare for å unngå nedrykk.
Øystese er nummer 9 av 12 lag, og har 19 poeng når éin kamp står att. Laget spelar siste kamp for sesongen mot Voss på bortebane 29. oktober. På 10.-plass ligg Fana 2 med 18 poeng. Også Os 2 på 11.-plass har 18 poeng. Øystese har monaleg dårlegare målskilnad enn båe desse laga. Alle tre kan enno rykkja ned og lida same lagnad som Bergen Nord.
