– Viktig del av jula

Vinnarlaget FC Mali danka ut Sossvoll Athletic, med cuparrangør Eivind Madsen Skeie på laget, i finalen.

Julecupen har blitt ein juletradisjon for Skeie. Han fortel om den nostalgiske kjensla han får når han kjem inn i idrettshallen i Norheimsund for å sparka ball 2. juledag.

– Når du kjem inn hallen og kjenner lukta – det er ei eiga lukt i denne hallen –, då veit du at det er cup, seier Skeie.

Han har saman med Kvam Futsal arrangert cupen dei tre siste åra, men tradisjonen går heilt tilbake til 1996. Før Kvam Futsal var det Norheimsund Fotballklubb og deretter Sleipner som stod for arrangementet.

– Det er mest moro, men det spissar seg til litt i sluttspela. Det er noko heilt spesielt å spela mot gamle lagkameratar eller kanskje til og med ein bror. Då kan konkurranseinstinktet bli ekstra sterkt, fortel Skeie.

Før cupen vert det arrangert fellestreningar som er opne for alle lag. Det har blitt ein del av tradisjonen, og treningane bidreg til å styrkja fellesskapet mellom deltakarane. Premien i år, i tillegg til heider og ære, var drikkeflasker og ullsokkar med humoristiske tekstar. Vinnarane kunne med andre ord gå heim både utørste og varme på føtene.

For alle aldrar

I år deltok 14 lag i julecupen. Målet er å nå 16 lag. Dei yngste deltakarane er fødde i 2011, medan dei eldste er det ein kan kalla «godt vaksne». Det er stor spreiing i alder, og det gjer turneringa endå kjekkare, trur Skeie. Lag frå ulike delar av regionen møtest for å konkurrera og ha det moro saman.

Planlegginga av cupen er det i hovudsak Skeie som står bak, med noko hjelp frå futsallaget.

– Det er ikkje så mykje arbeid, men det krev litt organisering. Me riggar hallen kvelden før og kjøper inn det som trengst på førehand, seier han.

Sidan 1996

Rune Øvsthus Kolltveit og Ole D. Ones har vore med sidan starten. Dei spelar på Hasunds Hund og har berre gjæve ord å seia om tilstellinga.

– Det sosiale aspektet er kanskje det viktigaste. Mange av oss har ikkje sett kvarandre sidan sist jul, og julecupen gjev oss sjansen til å trimma litt og ha det moro i lag. Aldersspreiinga er imponerande. Det gjer julecupen til ein arena der ulike generasjonar kan møtast til venskapleg kamp, seier Ones.

Kolltveit synest det er ekstra stas å spela mot den yngre garde.

– Det som er veldig moro, er at me kan få med dei unge, og at dei får kjenna på kor kjekt det faktisk er med sånn tullefotball, seier Kolltveit.

Ones og Kolltveit er samde om at det er artig å spela mot eigne born.

Hasunds Hund låg godt an midtvegs i cupen, men måtte til slutt gje tapt for dei yngre kreftene i FC Mali i kvartfinalen.

Det øydela likevel ikkje stemninga i laget.

– Julecupen er ein del av jula, seier Kolltveit.

– Ein viktig del, presiserer Ones.