Vertskap for nærare tusen

– Det vert litt heftig framover.

Leiar Arve E. Kolltveit i Hardanger skyttarlag er pensjonist, men har i alle fall i desse dagar rikeleg å hengja fingrane i. Komande veke får han nemleg truleg minst 900 gjester i stova – nærare bestemt storstova til skyttarane i Kvam.

Dei tilreisande skal skyta noregscupstemne, ei tevling som samlar mange av dei beste skyttarane i landet.

– Tysdag kveld passerte me 800 påmelde. Me spøkte tidlegare med at det kan koma tusen, men det ser faktisk ut til at me kan koma opp mot det. Det er veldig, veldig bra, seier Kolltveit.

Då HF sjekka torsdag føremiddag, var 878 påmelde. Påmeldingsfristen går ikkje ut før 24. juli.

– Er de i rute?

– Ja, det vil eg seia, men me er ikkje heilt i mål enno, seier Kolltveit.

Største nokosinne

Stemnet startar onsdag og varar til og med laurdag, med torsdag og fredag som dagane med størst aktivitet. Vel å merka kjem skyttarane frå dei to andre cuparrangørane i regionen for å skyta saman med dei lokale skyttarane allereie tysdag.

Skyttarlaget har skipa til noregscup før, i 2019, men omfanget var på langt nær slik det vert komande veke. Den gongen var tevlinga nemleg det avsluttande stemnet i cupen, noko som inneber at ein del hadde «falle frå» og ikkje såg seg syn med å delta.

Ei anna årsak til den store deltakinga er at stemnet vert skipa til parallelt med Landsskyttarstemnet på Voss, som startar fredag 28. juli. Der er over fire tusen påmelde.

Mange fleire enn dei største kanonane nyttar såleis høvet til å få med seg nokre stemne til i regionen i same slengen. Truleg vil ein del av dei tilreisande installera seg på campingplassar på Voss før dei reiser til Hardanger.

Smal veg til banen

Dei aller fleste vil truleg reisa på dagsturar til stemna i Hardanger, men Kolltveit reknar med at somme vil overnatta i bubil eller campingvogn på den store parkeringsplassen ved skytebanen. Storleiken på plassen reknar ikkje Kolltveit med vert noko problem, ettersom det er venta god sirkulasjon.

– Det er eit vanleg stemne og ingen finale, så folk kjem, skyt og reiser att, seier han.

Den største utfordringa for arrangørane, seier leiaren, vert trafikkavviklinga på Heradstveitvegen. Vegen er så smal at bubilar og campingvogner som møtest, mange stader ikkje vil kunna passera einannan. Skyttarlaget kjem difor truleg til å regulera trafikken og ha vakter oppe og nede, seier Kolltveit.

Han reknar med å ha 60–70 frivillige i drift for å avvikla tevlinga, som i tillegg til den ordinære baneskytinga omfattar noregscup i stang- og feltsnøggskyting. Dei to andre stemna i greinene i denne runden står Borstrondi Skyttarlag for.

Jondølingar i sving

Også i Gjeskadalen i Jondal førebur skyttarlaget seg på eit uvanleg stort storinnrykk komande veke. Her vert det andre av dei tre stemna i cuprunden avvikla. Det siste står Odda Skyttarlag, i samarbeid med Folgefonn Skyttarlag, for.

Torsdag føremiddag var 774 påmelde i Jondal. Leiar i Jondal Skyttarlag, Jarle Harkestad, fortel at det meste er klart før det brakar laus. Berre finpuss og vask står att. Sundag kjem skyttarane frå dei andre cuparrangørane for å skyta i Jondal.

Leiaren opplyser at 46 – i alderen 11 til 87 år – er førte opp på dugnadslistene. Alt frå standplassleiing og resultatsørvis til parkeringsorganisering og vaffelsteiking står på oppgåvelistene.

Også i Jondal kan den smale og bratte tilkomevegen skapa utfordringar, men her vert ikkje trafikken regulert. Så bratt er vegen at han ikkje er eigna for campingvogner. Vogneigarane vert difor bedne om å setja dei frå seg ved skulen i Jondal. Harkestad tippar ein kan rekna med at skyttarar i tre lag – til saman om lag nitti – med tilbehøyr er på banen til kvar tid.

Også i Jondal går stemnet føre seg frå onsdag til laurdag, med onsdag og torsdag som dagane med størst aktivitet.