Vann NM nummer ti
Trial-syklist Eirik Ulltang frå Øystese sikra seg sin tiande NM-tittel i helga.
Det hende då han sjølv arrangerte høvesvis noregsmeisterskap og noregscup i trial i anlegget på grusbanen på Haugamyr i Norheimsund laurdag og sundag.
– Eg har alltid hatt som mål å vinna ti NM. Det har eg no gjort. Folk trur kanskje at det er lett, men eg kan fortelja at det ligg utruleg mykje hardt arbeid bak, fortel Ulltang.
Berre to med
Han kjende ikkje den store gleda over å vinna. Til det var konkurransen for dårleg. Det var berre éin annan deltakar i eliteklassen.
– I år klaffa det dårleg for mange av dei beste syklistane. Me kunne fort vore mellom fem og ti deltakarar, men skadar og andre ting gjorde at berre to møtte opp. Likevel fullførte eg med 850 av 900 poeng, og eg reknar det som 100 prosent sikkert at eg hadde vunne også om me var fleire, fortel Ulltang.
Ulltang fortel at det var 17 deltakarar laurdag og 16 sundag. Over halvparten av deltakarane var frå Kvam.
– Dette er fordi Kvam har det største trialmiljøet i Noreg. Det var nokre syklistar frå Os, Arendal, Oslo og Kristiansand. Det var ingen rekord i talet på deltakarar, men det gler meg at det var langt fleire unge enn det plar vera, fortel Ulltang.
Planen var siger
HF fekk nokre ord med deltakar Sondre Tveiterås (15) frå Øystese før start laurdag. Han verka overraskande roleg, og fortalde at han har vore med eit par gonger før.
– Korleis har det gått?
– Nei, det har no gått greitt, svara Tveiterås.
– Kva tenkjer du om i dag, då?
– Eg skal no vinna, er planen, sa han.
Tveiterås har nemleg klara det før, men då var det berre to i klassen. Denne gongen var dei fire.
Tveiterås enda på 2.-plass i ungdomsklassen. Vinnar vart Ådne Undrum Larsen frå Kvam.
