- Vakraste banen i Noreg
Skøytepresident Mona Adolfsen var ikkje i tvil då ho besøkte den nye rulleskøytebanen i Vikøy.
Eldsjel og leiar i Hardanger skøyteklubb, Brynjulf Måkestad, fekk skryt frå fleire hald under opninga av banen onsdag ettermiddag. Sjølv kalla han banen den beste på Vestlandet - det finst vel å merka berre tre-fire av dei - og ein av dei beste i Noreg.- Dette er endå noko å vera stolt over i Kvam, sa ordførar Jostein Ljones.- Brynjulf, du har ei historie og eit pågangsmot som gjer at du får folk med deg. Frivilligheit, pågangsmot og eldsjeler trengst for å utvikla gode nærmiljø og gode anlegg. Så kan kommunen komma og skumma fløyten, sa han.
- Verdig føremål
Mona Adolfsen gjekk så langt som å kalla det den vakraste rulleskøytebanen i Noreg.- Når eg ser at så mange har møtt opp i dag, ser eg at dette er det einaste riktige for lokalmiljøet og for Hardanger skøyteklubb. Anlegg som dette har me behov for. Eg ser at mange born står klare til å ta fatt. Det gir meg eit stort håp om at skøytemiljøet kan veksa. Kanskje nokon av dei som står her i dag, ein gong vil trappa opp i trikot med norsk flagg på ryggen? sa ho. Skøytebanen har fått 200.000 kroner i spelepengar, 50.000 kroner frå Kvam herad, 80.000 kroner frå Sparebanken vest og 230.000 kroner frå Sparebankstiftinga Hardanger - til saman 560.000 kroner.Borghild Storaas Ones, styreleiar i sparebankstiftinga, sa at banen er eit verdig føremål. - Stiftinga er oppteken av at pengane skal utløysa arbeid og iver, slik at ei krone rekk lenger enn ei krone. Slik er det her: Mange gode krefter jobbar i lag, men nokon må dytta og dra. Det har Brynjulf Måkestad gjort, sa ho.
Festleg fart
Mange vaksne og endå fleire born var til stades under opninga.Mellom borna var Hedda Børsheim Erntsen, Eline Fosso, Lilly Lundblad-Sandbakk og Audun Børsheim Erntsen. Dei er ikkje i tvil om at banen kjem til å verta mykje brukt.- Eg kjem til å gå hit nesten kvar dag. Og i helgane. Eg bur rett i nærleiken og kan gå og trena ofte, seier Hedda.Alle fire seier at dei ønsker å melda seg inn i skøyteklubben.- Det kjekke med å gå på skøyter er at du kan gå fort. Eg går allereie ganske fort. Det er kjekt å ha begge beina i bakken, i motsetnad til når du syklar og berre sit på eit sete, seier Eline.Også Audun liker farten. - Det er ei kjekk kjensle. Eg kjem til å bruka banen mykje, seier han.- Det er gøy å kjenna lufta og farten når du går. Og å vera i lag med andre, synest Lilly.
Trur på auke
Då rulleskøytebanen ved kyrkja i Norheimsund vart lagd ned til fordel for ny barnehage for fire år sidan, lova politikarane å finna ein ny plass, men dei lova ikkje økonomisk stønad.Sidan har Måkestad arbeidd for å realisera ein ny bane. Han takka både kommunen og økonomiske bidragsytarar for hjelpa.Hardanger skøyteklubb har i dag 45 medlemer. Klubben runda 25 år i fjor.- Eg reknar med at medlemstalet vil auka fort no, sa Måkestad.
