Utklassa konkurrentane på Voss
Liv Sollesnes sette ny banerekord då ho vart samlagsmeister i baneskyting på Voss sundag.
Den nye rekorden lyder på 349 poeng med 14 innertiarar. Summen held med god margin til å sikra jondølingen meistertittelen, for fråstanden ned til Kjetil Skår frå Hardanger på 2.-plass var på heile 6 poeng. Joakim Øye, Hardanger, tok 3.-plassen i klasse 3–5 med 341.
Også i dei andre klassane dominerte Hardanger- og Jondal-skyttarar over dei andre laga i Hardanger og Voss skyttarsamlag.
Kristine Solheim Wikane frå Jondal vann juniorklassen med 345 poeng, Jonas Bjørke frå Hardanger klasse eldre rekrutt med 350 poeng og Ella Måkestad frå Hardanger rekruttklassen med 345 poeng.
Henry Øye vart meister i V55 med 342 poeng. Arne Berge frå Hardanger vann V73 med 350 poeng, like mange som Nils Lothe frå Jondal presterte på plassen bak.
Lyspunktet for andre lag var sigeren til Lars Kåre Almeland frå Voss i V65 og Nils J. Skjelnes frå Vareld i klasse 2.
Jondal – med Linea Storli Håvik, Tuva Lerfall Alsåker og Kristine Solheim Wikane – vann lagskyting for ungdomar med 295 poeng. Hardanger – Arne Berge og Henry Øyre – vann lagskytinga for veteranar med 200 poeng. Og i seniorklassane sikra Joakim Øye, Åsne Skår og Kjetil Skår sigeren for Hardanger med 293 poeng.
103 deltok. Komplett resultat finn du her.
