Ungdomar utmerkjer seg på Voss
Unge skyttarar frå Kvam hevdar seg på Landsskyttarstemnet. Fredag skal fire av dei delta i den same finalen i feltskyting.
– Det er litt overraskande å ha så mange med i finalen, men det er sjølvsagt veldig gledeleg, seier Arve E. Kolltveit.
Kolltveit er leiar i Hardanger Skyttarlag. Han fortel at det fyrst og fremst er ungdomane som har imponert i årets skyttarhøgdepunkt på Voss denne veka.
– Me hadde eit håp om at flest mogleg skulle gjera det bra, men me hadde ikkje trudd at så mange ville koma til finalen på førehand. Det er nesten litt «voldsomt», men veldig kjekt, seier han.
Ifylgje Kolltveit er det Ella Måkestad, Iselin Bjørke, Isak Bjørke og Ida Nybø Skogesal som skal i elden fredag morgon. Dei deltek alle i rekruttklassen i finfelt. I innleiande runde vart det 30 treff for både Måkestad, Iselin Bjørke og Skogesal, medan Isak Bjørke fekk 29 treff og såleis har marginale vinnarsjansar i den tøffe konkurransen.
Måkestad tronar endåtil einsam på toppen av den 224 namn lange resultatlista før finalen, med 30/26 etter dei innleiande 30 skota. Vel å merka tel ikkje innertreffa i finalen så sant det ikkje vert snakk om omskyting som fylgje av like finaleresultat. Då vil kvemmingen få eit fortrinn.
Ikkje full klaff
Hardanger Skyttarlag stilte på Voss med til saman 64 deltakarar. Medan fleire av dei yngre skyttarane har hevda seg, har ikkje seniorane nådd heilt opp, seier Kolltveit. Heller ikkje i samlagsskytinga vart det det heilt store dette året.
– Dei me trudde skulle hevda seg, har ikkje gjort det. Det vart for tøff motstand, fortel han.
Kolltveit påpeikar at fleire lokale utøvarar har gjort det nokså bra i dei innleiande rundane. I feltskyting skaut både Mathilde Nonås og Vegard Eide Aase 30 treff i klassen eldre rekrutt, og er klare for finalen.
Også Chris-André Bolstad Fauske fekk full pott – med 17 innertreff – i klasse 3–5 og er finaleklar. Like god var Liv Sollesnes frå Jondal.
– Flott arrangement
Nokre av dei lokale som har gjort det best i baneskytinga, er ifylgje Kolltveit Jonas Bjørke og Magne Lysen. I juniorklassen fekk Bjørke 348 poeng og enda på 17.-plass. Lysen fekk 346 poeng og ein 12.-plass i V55.
Kolltveit har sjølv delteke på stemnet på Voss, men var attende i Kvam då han snakka med lokalavisa. Han fortel om eit flott arrangement med fint vêr, mykje folk og god stemning.
– Det verkar som det meste har glidd veldig greitt, seier han.
I tillegg til finalar i feltskyting fredag er det finalar i mellom anna lagskyting og samlagsskyting torsdag. I lagskytinga representerer Jonas Bjørke, Steinar Vik, Dag Skår og Kjetil Skår skyttarlaget i Kvam.
Sollesnes best
Heller ikkje i år vart nokon frå Jondal Skyttarlag eller Hardanger Skyttarlag å sjå i det såkalla kongelaget. Skyttarkongen, Daniel Sørli, vart kåra onsdag. Han prikka inn 349 poeng og var utilnærmeleg.
Best av dei lokale vart jondøling Liv Sollesnes, som med ein serie i ståande på 46 poeng fekk 244 poeng i den innleiande skytinga. Med ein «omgang» på 99 enda ho på 343 poeng, 37.-plass totalt og 10.-plass mellom kvinnene. Ho vart elles nummer 3 i kampen om Norma-pokalen, som går til beste skyttar på minst 55 år i klasse 3–5.
Harald Kvåle frå Jondal kvalifiserte seg for den fartsfylte kampen om sigeren i felthurtigskyting torsdag, etter å ha fullført på 8,05 sekund og vorte den 4. raskaste. Aamund Selsvik frå Jondal vart nummer 38 i baneskyting i klasse eldre rekrutt med 348 poeng, etter å ha mista to poeng i finalen.
