Ungdomar bytte ut badebuksa med ski: – I år var det ekstra kjekt
– Det er jo litt sært å pakka skibagen og -skoa midt på sommaren, men det er eit veldig kult alternativ for sommarcamp, seier Anders Backe.
Han var ein av trenarane på årets sommarleir på Folgefonna som vart avvikla førre veke.
– Gje gleda vidare
På campen, som hadde base på Folgefonn hytte- og gardscamping, deltok til saman 125 ungdomar frå heile landet.
I år var det det 20. året Backe var med på tilstellinga. Dei fyrste åra var han sjølv med som deltakar.
– Eg hugsar kor stort det var då eg var liten og fekk ein knoke eller high-five frå dei eg såg opp til. No synest eg det er kjekt å kunne gje den gleda vidare til dagens unge, seier Backe.
Den profesjonelle freestylekøyraren frå Øst-Modum har konkurrert på ski, både nasjonalt og internasjonalt, og har fått finaleplass i X Games og teke del i fleire skifilmar.
Ifølgje Backe hadde ungdomane på leiren ulike mål. Medan nokre ynskte mest mogleg progresjon i idretten under opphaldet, var andre der mest for å hengja med venar. Uavhengig av formålet deira ynskte Backe at alle skulle få ha det kjekt på ski.
Lokale deltakarar
Av dei godt over 100 deltakarane var tre av dei frå Kvam og Jondal. Jondølingen Emil Toreid var med for andre gong. Han tykte det var kjekt å delta på ein camp med flinke trenarar, og fortalde at han opplevde framgang.
– I år var det ekstra kjekt, for eg klarte å læra fleire triks enn i fjor. Det er også kjekt å verta kjend med folk frå heile landet, fortel han.
Toreid har hjelpt til i både for- og etterkant av campen.
Ansvarleg leiar Pål Bentsrud synest det er kjekt å ha med lokale deltakar. Han har vore arrangør sidan 1998. Han sørgjer for at ungdomen skal ha det kjekt både i bakken og ved hovudbasen.
– Få skadar
Med sol kvar einaste dag var det mange som naut sommardagar. Frå morgon til kveld var dagane fylde med ulike aktivitetar og skate- og trampolinekonkurransar. Dei som ynskte å ta det meir med ro, kunne slå seg ned med Playstation og andre konsollar i eit eige telt.
– Det går berre nokre timar der ein pratar litt om ski og hoppar litt på trampolinen, så er ein i gang, seier Backe.
Trass i at dagane var lange og fulle av aktivitet, var det få skadar å melda om.
– Fokus på god oppvarming før dagane byrjar er ein viktig faktor for å unngå skade. Nokre skrubbsår og skadar vert det, og så er folk litt støle i kroppen, men det har ikkje vore beinbrot eller meir alvorlege skadar i år, fortel Backe.
Til saman var det fem trenarar på ski og to trenarar på snøbrett. I tillegg var det også to sjukepleiarar med. Som skitrenar saman med Backe, var blant anna Benjamin Forthun frå Bergen.
