Ulltang vart noregsmeister for åttande gong
– Eg har ikkje høge skuldrer når eg syklar. Det er eigentleg ganske avslappande.
Det seier den nybaka noregsmeisteren i biketrial, Eirik Ulltang, til HF måndag. I helga sikra han seg gullmedaljen for åttande gong på rad på heimebane.
I fint haustvêr humpa han og 16 andre aktive syklistar rundt på eitt og to hjul i sykkelløypa ved fotballbana i Norheimsund i helga. Dei forserte kabeltromlar, steinar og andre hinder og gjorde det dei kunne for å sanka flest mogleg poeng.
Arrangementet var det Hardanger Sykkelklubb si trialgruppe, Kvam Biketrial, som stod bak. På programmet var eit noregscupritt laurdag og noregsmeisterskap sundag. Ritta bestod av ulike seksjonar med forskjellige vanskegrader båe dagar.
Saknar større deltaking
Noregsmeister Ulltang trenar dei lokale trialsyklistane saman med Sondre Stranden Rosten. Han var godt nøgd med gjennomføringa av arrangementet, men fortel at han gjerne kunne tenkt seg at fleire deltok.
– Eg vert lei meg når så få deltek, for eg veit kor kjekt dei kan ha det. Eg ser at dei som er med, alltid er så glade og gira etterpå, seier Ulltang.
Han understrekar at han ikkje berre er oppteken av syklinga for sin eigen del, men at han også likar å arrangera ritt for andre. Ulltang ynskjer at andre skal få oppleva gleda syklinga gjev. Ifylgje han er løypene tilrettelagde på ein måte som gjer at ingen skal vera hindra i å delta.
– Nokre av spora er så enkle at ein skal kunna klara dei utan å ha trena noko særleg på førehand, fortel Ulltang.
Lang sigersrekkje
Dei 17 deltakarane var fordelte på 6 klassar. 8 av dei deltok i dei yngste klassane frå 6 til 15 år. Sjølv om deltakartalet var noko høgare på arrangementet i fjor, var det slik det stort sett har vore dei siste åra, ifylgje trialsyklisten. Han fortel at det er ein del utskiftingar i den nokså smalte idretten, og at dei fleste ikkje held på så lenge.
Ulltang har vunne det meste av noregsmeisterskapar og -cupritt dei siste åra, i tillegg til å ha vunne noregscupen kvart år sidan 2012. I helga hamna Ulltang øvst på resultatlista båe dagar i eliteklassen for dei over 18 år.
I noregsmeisterskapen sundag fekk Ulltang 660 poeng. Kvemmingen var heile 250 poeng framføre Joachim Skjævestad (Idrettsklubben Hero), som kom på 2.-plass med 410 poeng. Kristian Schea Bergersen (Follo Sykkelklubb) enda på 3.-plass med 250 poeng.
