Turnering for dei yngste

Både sørvane og fingerslaga sat i grunnen godt, meinte Thea Soldal og Olivia Gjerde då HF slo av ein prat med dei etter ein jamn kamp mot Kvernbit sundag. Kampen enda uavgjort, og var dagens andre.

Laget deira – Rossvoll raud – var eitt av 22 påmelde lag i U13-turneringa i volleyball. Inst i hallen tevla 13 lag i klassen «teen» for tenåringar.

Tiåringane spela fyrst kamp like ved inngangsdøra då HF var innom. Kven dei spela mot, fekk korkje jentene eller journalisten med seg i virvaret.

Kampklare

Stemninga i hallen var som ho skal vera ein slik dag. Lukt av vaflar, godt brukte joggesko og idrettshall, sprettande ballar i alle retningar, ungar som flyr hit og dit utan å sjå seg særleg mykje for og foreldre med mobilkamera og kaffi på tribunen. Sundag var ikkje noko unntak.

Thea og Olivia har spela volleyball sidan før nyttårsaftan, fortel dei. Å vera med på turnering er både spanande og moro, synest jentene. Det er kjekt å spela mot mange lag. Men nett sørving og kasting av ball til kvarandre lyt dei gjerne øva litt på, fortel dei unge spelarane.

Etter praten med journalisten venta fleire kampar.

– Skal de vinna?

– Ja! sa jentene samstemt.

– God øving

Turneringa vart arrangert av elevar i toppidrettsfaget i volleyball på Kvam vidaregåande skule. Lærar Eilev Nyland seier elevane skal vera med i noregsmeisterskapen og andre turneringar neste skuleår, og at inntektene går til deltakinga. Så er det mykje læring i å arrangera, seier han. Elevane har hatt ansvaret for både kiosken og sekretariatet.

I tillegg måtte elevane stilla med lag sjølve for å få kabalen til å gå opp. I ei liknande turnering stilte elevane dessutan som lagleiar for dei som trong det.

– Det er god øving for elevane. Fleire er også trenarar lokalt i klubben. Dei er veldig flinke, seier Nyland.

Totalt har volleyballina 18 elevar fordelte på tre kull, opplyser han.