Trufast trenarduo gjev seg på topp etter seriemeisterskap

Det var Dale/Stanghelle/Vaksdal som kom til Norheimsund stadion for å måla krefter i heimelagets siste kamp for sesongen. Sigeren smaka godt etter ei nokså irriterande avslutning på fjorårets sesong. Berre målskilnaden – nærare bestemt to mål – skilde kvemmingane frå fyrsteplassen.

– Det var kjekt at me klara det no. Det har vore ein milepæl, og me har sett at det har vore viktig for gutane, seier Flotve.

Han hadde sin siste kamp som trenar for laget.

Målrik avslutning

Norheimsund/Øystese vann 5–0. 3 av skåringane kom før pause. Fyrst ut var Kristian Kaldestad, som fekk ballen i mål etter 13 minutt. Så tok Elia Mong over stafettpinnen, før også Håkon Norheim fekk kjenna på skåringsglede.

Etter pause var det Eirik Øvsthus Kolltveit sin tur. Ungguten skåra i 64. minutt, før Mong fekk sitt 2. mål for kvelden etter 72 minutt.

Med sigeren i boks leiar Norheimsund/Øystese tabellen med 21 poeng etter 9 kampar. Nymark tok 2.-plassen med 18 poeng, fylgt av Austevoll med 17 poeng. Éin kamp står att i serien, men kampen kan ikkje påverka fyrsteplassen til kvemmingane. Dei kan såleis kalla seg seriemeistrar.

Trenar Flotve seier kampen jamt over var bra, men det var langt frå det beste laget har prestert. Kvaliteten var litt ymse, seier han.

Ei anbefaling til alle

Flotve har trena G15-laget saman med Tore Hoff i mange år. Trenarduoen har trufast fylgt gutane sidan dei alle sprang samla etter ballen i 1. klasse. Flotve melde seg som trenar av di sonen hans var med på laget. Det var naturleg å vera med, seier han. Også sonen til Hoff har vore med heile vegen.

– Så det er vel eigentleg grunnen, i tillegg til ei stor interesse for fotball, seier Flotve.

Nokre tenkjer kanskje på travle ettermiddagar og helgar, og kampar i alle retningar, men det ligg mest glede bak vervet, skal ein tru trenaren.

Å vera med born og unge i idrett er noko han vil anbefala alle foreldre. Det gjev meirverdi og påfyll. Ein føler at ein bidreg til noko som gjev noko tilbake, seier han. Samstundes har det vore moro å fylgja utviklinga. Det å sjå gutane gå frå å vera litt sjenerte og gjerne kika i bakken, til å verta trygge, finna sine plassar og verta både tøffare og meir verbale.

– Det har vore veldig kjekt, seier trenaren.

Ny start med nytt lag

Også spelarane på laget har vore svært stabile, fortel Flotve. Gutane er veldig forskjellige og kjem frå ulike miljø, men har heile vegen stilt likt på banen. På banen handlar det ikkje om kven du er eller kvar du kjem frå. Då er det fotballen som gjeld.

– Så er dei veldig fine med kvarandre. Det er lite «kviskring og tisking» og dårleg snakk. Det er eit godt miljø, seier Flotve.

Tore Hoff var på arbeid i Nordsjøen, og fekk korkje kampen eller intervjuet med seg. Kampen tysdag kamp var den siste før roret skal overtakast av andre. Frå no av skal Denis Ljubovic og Rune Øvsthus Kolltveit trena laget. Dessutan skal gutane slåast saman med laget som er eit år yngre.

– Hadde tru på laget

Isak Valland Lyngset er mellom gutane som har hatt Flotve og Hoff som trenarar sidan han gjekk i 1. klasse. Han skryter av trenarane, som ifylgje han har gjort ein god jobb og lagt ned ein stor innsats.

– Dei seier sjølve at me har lært det dei har å læra oss, men eg trur me framleis hadde hatt mykje å læra, seier Lyngset.

– Så har dei vore veldig opptekne av å ta vare på alle, legg han til.

Fjorårets 2.-plass var kjip, synest Lyngset. Det, i tillegg til at det var siste sesong for trenarane og før samanslåinga, har nok ført til mykje god motivasjon, trur han. Det gjorde det også ekstra fint å vinna serien.

– Hadde du trudd at de kom til å vinna?

– Me hadde spela mot dei same laga før og gjort det ganske bra, så ja – eg hadde sterk tru på laget, seier Lyngset.