Treng hall på 264 rutemeter

Idrettslaget ynskjer difor at området får endra status i samband med revisjonen av arealplanen til Ullensvang kommune. Det skriv laget i eit innspel til planen. Hallen vil måla om lag 22 gonger 12 meter.

Det var verksemdleiar for eigedom, Per Gunnar Hammer, som peika på Fjøringen som ei mogleg plassering av ein slik hall. Laget har vore på synfaring og funne ut at hallen vil kunna få plass på området. Ifylgje laget er arealet i kommunal eige. Det kan vera naudsynt å flytta ei grindverkshytte som er i bruk for skule og barnehage.

Idrettslaget ynskte i utgangspunktet å byggja på ballbanen i Sætveithagen, men han er definert som eit statleg eigt friareal. Føresegnene gjev ikkje høve til å setja opp bygg der ein krev betaling for å nytta arealet. Å driva ein slik hall krev inntekter, sjølv om idrettslaget ynskjer å halda brukarbetalinga så låg som mogleg, skriv leiar i laget, Gudmund Toreid.

Dersom Jondal idrettslag likevel ynskjer å gå vidare med planen om tennisanlegg i Sætveithagen, er tennisbane det ein i fyrste omgang må satsa på. Det vert sendt ut eit spørjeskjema til medlemene for å lodda interessa. Det går fram av eit referatet frå eit styremøte for laget 18. oktober.

Ein vanleg tennisbane som er open for bruk, vil truleg vera i samsvar med reguleringsplanen, meiner idrettslaget. I føresegnene står det at friområdet skal sikrast for ålmenn bruk og at ein kan godkjenna bygg med naturleg tilknyting til områdefunksjonen, til dømes toalettanlegg.

Maksimalt tippemiddeltilskot for ein utandørs tennisbane er 250.000 kroner. Kostnaden for ein bane er rekna til minst 750.000 kroner. Maksimalt tilskot til innandørs padeltennisbane er 400.000 kroner. Tilskot til sjølve hallen vert vurdert av Kultur- og likestillingsdepartementet.

Padel er ein racketsport som kombinerer element frå tennis og squash. Sporten er ein av dei raskast veksande i verda, ifylgje tennis.no.