Tre mål etter 90. minutt

Samarbeidslaget hadde ein 5–0-siger over Bønes på heimebane med seg i bagen då det møtte Galgen på Krohnsminde Kunstgress før helga. Men siger vart det ikkje denne gongen.

Motstandarlaget, som ligg på nedre del av tabellen i 5. divisjon, stod for kampens 1. mål etter 18 minutt av kampen. 10 minutt før pause utlikna Øyvind Floen Berge. Etter kvila tok Galgen leiinga etter ein skåring i det 57. minutt.

Med 10 minutt igjen av ordinær tid måtte Øystese/Norheimsund klara seg utan Kasper Wilhelmsen Botnen, som fekk sitt 2. gule kort og vart utvist.

Heilt på tampen kom 3 mål som perler på ei snor. Fyrst skåra Anders Botnen i det 91. minutt, og 2 minutt seinare skåra Floen Berge sitt 2. mål. Trua på siger var truleg til stades, men 5 minutt på overtid vart håpet knust. Galgen fekk ballen i mål, og poengdelinga var eit faktum.

Øystese/Norheimsund ligg på 7.-plass på tabellen med 25 poeng etter kampen. Neste kamp – som er sesongens nest siste – er på heimebane mot Fotlandsvåg komande fredag. Fotlandsvåg ligg på 3.-plass med 35 poeng.