Tre døger med gaming
Nytt styre i Kvam E-Sport førebur seg til årets KvammaLAN. – Me har god kontroll på det me har hugsa på, i alle fall.
Det seier Hallvard Valland Nordheim, som tok over som styreleiar i klubben i vinter. HF møter han og resten av styret måndag kveld, etter nokre timar med planlegging av årets KvammaLAN. Klubblokala er som venta med dunkelt lys, neonlys, skjermar og solide sofaar.
Lærerikt og keisamt
Nordheim, som går i 10. klasse, har vore med i klubben sidan han vart stifta. Han har vist engasjement og vart i vinter spurd om han ville vera med i styret. Det ynskte han. Samstundes vart det kjent at styreleiar Daniel Olsen ville gje seg, og Nordheim hoppa like gjerne i det. Det har gått fint, seier han.
– Det er mykje e-postar og rekneskap. Det er ganske kjedeleg, eigentleg, men lærerikt. Så ser eg til at alle andre gjer som dei skal, seier styreleiaren.
Klubben tel om lag tretti medlemer, i tillegg til at det vert arrangert «hang out» tre dagar i veka, som er eit gratistiltak også for dei som ikkje er medlemer. Oftast møter mellom fem og ti personar, seier Alexander Nicholas Nordlinder Nitter. Han er òg forholdsvis fersk i styret, men godt kjend med klubben.
– Eg har alltid hatt interesse for gaming, og har lyst til å hjelpa andre og møta folk som kanskje ikkje har så mange andre å spela med, seier han.
For tredje gong
Tysdag opnar e-sportsklubben dørene til Øystese idrettshall og håpar å samla vel åtti born og unge til å spela saman. Det er tredje gongen KvammaLAN vert arrangert, og mykje skal planleggjast og koma på plass.
Det meste vert som før, seier arrangørane. Ein skilnad er lengda på arrangementet, som har strekt seg frå 70 timar til 72 timar. Då kan ein seia at det varar i tre døger, og ikkje i 70 timar, fortel styreleiaren. Elles har klubben teke inn litt fleire konkurransar, og prøvd å vera meir inkluderande, seier han.
Onkelen til styreleiaren, Christoffer Valland, er også med i styret. Ifylgje han er det meste i boks til arrangementet, sett vekk frå underhaldning frå scena.
– Ho vart avlyst i siste liten, så der må me få ordna noko på kort frist.
– Men éin ting kan me garantera, og det er god stemning. For det kjem det til å verta! forsikrar Nitter.
