Furedalen Alpin opna laurdag. Sola lokka mange ut i løypa. Sundag var det overskya. Måndag er det meldt pissregn.

Travel opningsdag i Furedalen

Skitrekket i Furedalen hadde sin fyrste opningsdag laurdag. – Folk er glade og gira. Det er veldig kjekt, seier driftsleiar Eirik Mo.

Journalist
Publisert Sist oppdatert

Sidan nyttår har dei tilsette ved Furedalen Alpin jobba med å produsera nok snø til å opna skitrekket. Det har vore travelt, påpeikar Mo.

Køen til heisen var lang fyrste opningsdag.

– Me har jobba intenst med å produsera så mykje snø som me kan, fortel Mo.

Driftsleiaren fortel at det er naudsynt med minusgrader og kulde for å produsera snø. Etter nytt år har temperaturen sokke. Difor klarte dei tilsette å produsera nok til å opna laurdag, seier Mo.

Eirik Mo måtte handtera mange arbeidsoppgåver laurdag.

Fyrste tur

Barnetrekket og bakken til høgre for skianlegget var ope laurdag. Bakken til venstre var framleis ikkje klar.

Charlotte Sandvik, busett i Øystese, hadde hatt to turar i bakken før ho kom i prat med HF. Ho påpeika at det var hardt føre i løypene.

Charlotte Sandvik etter sin andre tur ned bakken. – Det er litt lausare snø ved sidan av skiløypa, påpeika ho.

Tre år gamle Johanna Haugsland Hamre frå Bergen hadde sin aller fyrste tur med slalåmski på beina. Ho fekk god hjelp av pappa, Bjørnar Hamre, ned bakken. Han gav dottera nokre lovord før dei skulle inn og varma seg.

Bjørnar Hamre og Johanna Haugsland Hamre på veg ned bakken.

Uvisse opningstider

Dagleg leiar i Furedalen Alpin, Jan Guttorm Skeie, hadde ein travel dag på jobb laurdag.

– Eg lyt hjelpa til med å finna eit par ekstra parkeringsplassar. Det er berre eg som veit om dei, seier Skeie.

Jan Guttorm Skeie flytta seg etter kor det var behov.

Skeie fortel kva som måtte til for å opna laurdag. Den siste veka har dei tilsette jobba døgnet rundt for å produsera nok snø til opninga, fortel han.

– Det kom 60 centimeter med puddersnø, men vinden gjorde at alt bles vekk, fortel Skeie.

Parkeringsvaktene og Skeie samarbeidde for å få plass til dei som kom. Klokka 13 var parkeringsplassen nesten full.

– Eg trur besøkstala er rundt 1.500 i dag, seier Skeie.

Ulike tilhøve

Eikedalen Skisenter opna to små skiheisar nyårsaftan. Årsaka til at Furedalen Alpin ligg etter, er skilnadar i terrenget, påpeikar Skeie.

– Me har eit kupert løypeterreng. Me treng éin kilometer med samanhengande snø til dei store heisane. Det tek litt tid, fortel Skeie.

Den daglege leiaren understrekar at forholda for snøproduksjon ikkje har vore optimale. Han håpar på fleire kuldegrader og snø.

Han fortel at det er vanskeleg å seia kor ofte det vert ope dei neste vekene. Til veka stig temperaturen og det er meldt mykje nedbør.

– Me lyt berre sjå korleis vêret blir. Me lyt gjera vurderingar undervegs, seier Skeie.

kvamskogen sport ski
Laga med Labrador CMS