Trassa vind og stilte til start
To gonger på rad har idrettslaget i Jondal måtta utsetja serierenn i langrenn. Fredag gjekk renn nummer 4 som planlagt.
Dårleg vêr og kollisjon med anna arrangement har vore årsakene til at både det andre og tredje langrennet har vorte avlyste på Storemyr. Trass i at vêrmeldinga varsla vindkast på 20 meter i sekundet, arrangerte Jondal Idrettslag serierenn fredag.
På heimesida opplyser arrangøren at i alt 38 løparar deltok i sprinten i klassisk stil. Deltakarane starta i samla felt, og både start og målgang var på same stad, ifylgje arrangøren.
20 av friskusane var 10 år og yngre. 13 av dei stilte i klassane for dei frå 11 til 16 år. Medan dei yngste gjekk på myra, gjekk dei som var hakket eldre, halv løype.
Dei vaksne som deltok, var to karar i klassen 42–49 år. Dei gjekk heil løype. Dessutan stilte tre damer i trimklassen, der ein sjølv kan velja kor langt ein vil gå.
