Trassa regnet for kreftsaka
85 deltok i Rosa sløyfe-løpet i Norheimsund onsdag kveld.
Bak løpet stod Hardanger Treningssenter AS. Løpsleiar Anette Tyssebotn fortel at talet er lågare enn dei om lag to hundre som deltok i fjor. Sidan vêret var like trasig i fjor som i år, trur ho andre ting ligg bak nedgangen.
Sjå video frå oppvarminga til løpet her:
– Eg veit at ein del personar ikkje kunne delta fordi det var foreldremøte i barnehagar og skular i går. Dessutan er det Kvammaveko denne veka. Eg veit mange var opptekne med den. Det er litt synd med så stor nedgang sidan løpet er for ei god sak, men samstundes er me veldig takksame til alle dei som stilte opp, seier ho.
– Støttar viktig sak
– Kvifor trassa så mange regnet?
– Eg trur dette er ei viktig sak for mange. Mange vert råka av brystkreft eller kjenner nokon som har vorte råka. Dessutan er dette eit lågterskelløp der løypa er flat og lett å koma seg gjennom. Du kan springa, gå eller trilla barnevogn om du vil. I fjor var det til og med ei som vart trilla gjennom løypa i rullestol, seier Tyssebotn.
Det varierer kor seriøst deltakarane tek løpet.
– Det er ei lita gruppe som spring fort, men dei fleste deltek for å bidra til ei god sak, få seg ein triveleg tur og vera sosiale, seier ho.
Arrangørane noterer ikkje tider. Deltakarar som vil vita kor lang tid dei brukte, må sjølve stå for tidtakinga.
Alle deltakarane er med i trekkinga av premiar arrangørane har fått frå sponsorar. Førstepremiane var – ironisk nok på ein søkkvåt kveld – to høgtrykksspylarar.
Nytt løp neste år
Deltakarane må betala for å vera med på løpet. Tyssebotn fortel at deltakaravgifta genererte 12.750 kroner. Pengane går til kreftsaka.
– Kva skjer neste år?
– Då vert det nytt løp. Til neste år skal me prøva å få opp deltakartala ved å passa på at løpet ikkje kolliderer med så mange andre arrangement, seier ho.
