Tok sylv i internasjonal turnering
Sandvolleyballspelar Sunniva Helland-Hansen frå Øystese kom på 2.-plass i Tyskland i helga.
Saman med lagveninna Emilie Olimstad kjempa kvemmingen seg nesten heilt til topps då dei deltok i turneringa King of the Court i Hamburg. Dei to damene vart slegne berre av ein amerikansk duo.
– Dette betyr mykje! Me har aldri vore på pallen med slik motstand før, seier Helland-Hansen.
Ifylgje henne er turneringa ein nyare variant av sporten som nyttar eit anna poengsystem og turneringsformat enn ordinære verdsturneringar. Kvar runde startar med fem lag som rullerer på å vera på bana, og sidan alt går på tid, kan det kan vera kostesamt å gjera feil, forklarar ho.
I semifinalen møtte den norske duoen tøff motstand. Eitt av para dei spela mot, var to tyske kvinner som tidlegare har vunne både VM og OL, fortel Helland-Hansen.
– Det gjer at resultatet kjennest veldig stort, seier ho.
Til no har sesongen til det norske paret vore prega av skadetrøbbel. Kvemmingen fortel at lagveninna har hatt problem med ei skulder, som har ført til at dei ikkje har konkurrert på sju månader. Dimed smaka sylvet ekstra godt.
– Me var både tolmodige og aggressive. Me spela med låge skuldrer, men var samstundes ikkje redde for å prøva nye ting, fortel Helland-Hansen.
Dei komande vekene vert travle for det norske sandvolleyballparet, med fleire turneringar som ventar. I tillegg skal dei spela OL-kvalik på Lillehammer. Same veke er det NM i sandvolleyball i Lillesand. Då skal jentene gjera det dei kan for å forsvara NM-gullet frå i fjor.
– Det vert ekstra viktig å gjera det me kan for å ta omsyn til kroppen og skaffa overskot, seier Helland-Hansen.
