Tok seg ein fest etter over tusen timar med dugnad

Tre store sjokoladekaker som til saman openberra teksten «Herand Aktiv», var tinga og delte ut i rause porsjonar til dei frammøtte på plassen ved kulturhuset 2. pinsedag.

Varaordførar og herandsbu Kjellaug Hoås Samland fekk æra av å utføra den høgtidelege opninga av anlegget, etter at ein fanfare var spela. Det gjorde ho på tradisjonelt vis då ho klipte eit band med fargane til det norske flagget, til stor applaus frå mange frammøtte som naut samvær, betasuppe, kake og is i solsteiken.

Litt står att

Leike- og treningsområdet på plassen ved kulturhuset, med ymse klatre- og treningsstativ for folk i alle aldrar, disser, traktor, sklier og sandkasse ved den gamle barnehagen og to glinsande, blå treningsapparat kloss i ballbingen, er meir eller mindre fiks ferdig. Det står att å fjelga området ved sistnemnde apparat litt.

Dessutan er fleire nyhende – og litt meir arbeid – i vente. Margreta Sandvin Eiken i Herand Bygdelag fortel at det er bestemt at det gamle kunstgraset skal bytast. Nytt gras er allereie tinga, og finansieringa er på plass.

Elles skal det mellom anna målast, murast, skiltast og setjast ut benker. Kviling på laurbær må med andre ord venta litt til, sjølv om anlegget vart feira måndag.

– Alle like viktige

Eiken fortalde dei frammøtte at over tusen dugnadstimar er lagde ned. Sjølve anlegget, bygd i solide og vedlikehaldsfrie materialar, har kosta kring to millionar kroner. Ymse arbeid med mellom anna gjerde, måling, drenering og nytt gras har kosta kring ein halv million. Alt er fullfinansiert med eigenkapital, gåver, tilskot og spelepengar.

– Me bøyer oss i støvet for all velvilje, arbeidsinnsats og oppmuntring. Alle moner dreg, og alle er like viktige, sa Eiken, som forsikra om at alle bidragsytarar vil verta nemnde på eit nytt skilt som skal koma på plass på kulturhuset.

Ideen om anlegget tok for alvor form hausten 2019, då bygdelaget og idrettslaget byrja leggja konkrete planar. Eit viktig bakteppe og ein motivasjon var tilbakemeldinga frå Ullensvang kommune om at dei gamle leikeapparata truleg ikkje ville verta godkjende. Kommunen støtta såleis ideen om fornying.

Dugnadsarbeidet tok til i fjor haust, med rettleiing frå leverandør Sandvik Play. Sidan har det gått slag i slag, med ymse utfordringar frå vêrgudane undervegs. Til dømes måtte ein ha ein eigen dugnad for å moka og salta området då gummidekket skulle leggjast. Vesle julaftan kunne borna for fyrste gong få testa apparata i eit elles uferdig område.

Eiken seier til HF at anlegget har vorte ein møtestad som lokkar til seg fleire enn dei lokale heltane. Rett som det er ser ho framande bilar køyra inn til området.

Ikkje berre kake

Arrangementet vart kombinert med Herand Rundt, som hadde litt uvanlege starttidspunkt for å vera tilpassa til festen midt i samkoma. Det kan vera noko av årsaka til at det var ein del færre deltakarar enn normalt, spekulerer Hildegunn Samland i Herand Idrettslag. Til dømes deltok berre éi vaksen kvinne, Maria Vassel.

Dei fyrste og yngste deltakarane la i veg allereie klokka 10. Det kan ha vore litt vel tidleg til at til dømes kvemmingane rakk å kryssa fjorden; det var færre av dei i år, slår Samland fast.

For dei som møtte fram, gjekk arrangementet som smurt. Eller – det vil seia – for nokre gjekk det tungt. I alle fall var det tilbakemeldinga HF fekk frå fleire av dei som spurta i mål. Dei kunne ikkje klaga på tilhøva – tørt og fint var det –, men tungt var det altså lell i varmen.

Minst tungt og snøggast gjekk det for Jaroslaw Lazarowicz, som vann herreklassen med tida 19.28 minutt. Vassel sprang på 24.37 minutt.

Sjå bileta frå Herand Rundt her: