Tok knekken på Galgen
Øystese/Norheimsund slo botnlaget med det dystre namnet 4–2 laurdag. – Stor stemning, seier veteran.
Fotballkampen i 5. divisjon vart spela i Norheimsund. Årsaka var ein cup for born på kunstgrasbanen i Øystese i helga.
Sjølv med litt uvant kunstgras under knottane rodde heimelaget sigeren greitt i land, sjølv om gjestene var ofseleg nære å redusera til 2–3 då dei skaut i stolpen eit stykke ut i 2. omgang.
Fomla ei stund
3 skåringar på 20 minutt sikra heimelaget ei komfortabel leiing halvvegs. Eit sjølvmål i samband med eit tilbakespel til målvakt Vinjar Voster nær sagt før 2. omgang var blåsen i gang, sytte for ei viss spaning. Men i staden for ei ny redusering sette Anders Botnen spikaren i Galgen-kista. Ei ny redusering på overtid var ikkje til stor gagn.
– Me bruka litt tid på å reisa kjerringa etter tabben. Etter fomling i 15–20 minutt tok me tak i det att og skåra eit fint mål, seier veteran Rune Øvsthus Kolltveit.
Han spela på høgresida for heimelaget, saman med ein annan veteran, Eivind Madsen Skeie.
– Mykje godt spel, men me er framleis vår eigen største fiende når me mistar fokuset. Det er ein del av reisa. Me lærer av det, seier Kolltveit.
Garderobefest
Han seier det var stor stemning i garderoben – «nesten som i gamle dagar» – etter kampen. Stamma i laget er svært lokal, og med inntoget til Erlend Lilletveit Kvåle og Hans Berge, som melde overgang frå Tertnes i vår, har laget fått eit ekstra lyft. Dessutan var Øyvind Berge tilbake laurdag, etter å ha slite med skade i vekevis.
– Sjølv om det var mykje rot, var det ein veldig kjekk kamp å spela, seier Kolltveit.
Litt ekstra moro var det at motstandaren med det særeigne namnet, eit bydelslag med Krohnsminde som heimebane, romma nesten eit halvt lag med tidlegare Framnes-elevar som har spela for Norheimsund. Fleire av dei har i tillegg spela futsal med Kolltveit og Øvsthus.
Kvemmingane, som ligg om lag midt på tabellen med 14 poeng, spelar bortekamp mot Fotlandsvåg fredag 14. juni. Dinest vert vårsesongen avrunda med heimekamp mot Telavåg onsdag 19. juni.
Galgen ligg nest sist på tabellen, med 2 poeng og 79 baklengsmål på 10 kampar. Medan heimelaget hadde 9 på benken og bytte ut 5 spelarar i éi vende, stilte gjestene med berre 2 benkeslitarar.
