– To nedrykk er ingen katastrofe
Tabellane tyder på at fotballsamarbeidet mellom klubbane i Norheimsund og Øystese har vore ein fiasko. Ein styreleiar og ein styremedlem er ikkje samde i det.
I fjor haust vart det klart at fotballklubbane i Øystese og Norheimsund for første gong skulle stilla med felles herrelag. Dermed vart A-laget Øystese/Norheimsund og B-laget Norheimsund/Øystese 2 skapt.
Når 2023-sesongen nærmar seg slutten, ser ikkje samarbeidet ut til å ha vorte ein suksess. Begge laga ligg på botnen i sine avdelingar. B-laget har allereie rykt ned frå 5. divisjon, medan A-laget, som spelar i 4. divisjon, har 4 poeng opp til nedrykksstreken når laget har 3 kampar att å spela.
Øystese/Norheimsund har berre ein siger på dei siste 7 kampane. Fleire av tapa har vore med stygge siffer. Kvemmingane møter Arna-Bjørnar, som ligg på 2.-plass i avdelinga, på laurdag.
Skuldar på spelarflukt
Rune Øvsthus Kolltveit er styremedlem i Øystese Fotballklubb, og har dessutan spela for A-laget denne hausten. Han trur spelarflukt er ei av årsakene til dei dårlege resultata.
– Øystese hadde lenge ei stamme med spelarar som budde utanfor kommunen og pendla til treningane. Heile denne stamma forsvann før sesongen. Det gjer at Øystese/Norheimsund i hovudsak er det same laget som i fjor spela for Norheimsund i 5. divisjon i fjor, fortel han.
Sidan mange av dei beste Norheimsund-spelarane er elevar på Framnes Kristne Vidaregåande Skule, mista Øystese/Norheimsund fleire gode spelarar i sommar. Difor vart det bestemt at B-laget denne hausten skal bestå av juniorspelarar, medan alle seniorspelarane skal spela for A-laget.
– Det førte til at gamle travarar som meg sjølv, som hadde tenkt å trappa ned i 5. divisjon, måtte trø til i 4. divisjon, fortel Kolltveit.
– Kvifor vart ikkje pendlarane med vidare?
– Det veit eg ikkje. Eg har ikkje inntrykk av at samarbeidet er ei hovudårsak, men samarbeidet har nok gjort nokre spelarar usikre, seier Kolltveit.
Styreleiar Erlend A. Ellingsen i Norheimsund Fotballklubb minner om at Øystese sleit med å halda plassen i 4. divisjon i fjor òg.
– Kanskje er 4. divisjon eit litt for høgt nivå? Kanskje hadde det vore meir naturleg om laga spela i 5. og 6. divisjon denne sesongen? Slik eg ser det, har ikkje det viktigaste denne sesongen vore å halda plassane i divisjonane. Fokuset har vore på å etablera stabile grupper med spelarar som kan utvikla relasjonar saman. Mange av laga me møter, har spela saman i mange år, medan me har hatt for mange utskiftingar berre frå i vår til i haust, seier han.
– Ingen fiasko
– Kva seier de om nokon hevdar at samarbeidet var ein tabbe?
– Eg er ikkje samd. Me visste at det kom til å verta tøft. Det tek tid å staka ut ein felles kurs som skal gå frå junior- til seniornivå. Resultata har vore dårlege. Likevel meiner eg det er mykje utvikling i det me opplever. Ein lærer av å tapa kampar. Spelarane får kjenna kva som krevst for å vinna, seier Kolltveit.
– Eg tykkjer ikkje det. Det viktige er å skapa ein god treningskvardag. Der tykkjer eg me er på rett veg, seier Ellingsen.
– Kan eit dobbelt nedrykk påverka samarbeidet?
– Eg veit ikkje. Me må evaluera etter sesongen. Personleg meiner eg samarbeidet bør halda fram. Eit nedrykk er ikkje ein katastrofe. Det går an å rykkja opp att, seier Kolltveit.
– Eg trur ikkje det. Styra i klubbane har aldri samarbeidd betre enn no. Eg føler meg trygg på at samarbeidet held fram til neste år. Me kan ikkje lata prosjektet vakla sjølv om tabellen ser ut som den gjer, seier Ellingsen.
