To heimetap i sesongpremieren til felleslaga
Dei nye samarbeidslaga fekk ein røff start på fotballsesongen fredag kveld.
A- og B-laget til fotballklubbane i Øystese og Norheimsund spela om lag samstundes fredag kveld. Kampane var dei aller fyrste på seniornivå der klubbane stilte med sams lag, etter at dei inngjekk avtale om samarbeid i fjor.
A-laget tapa 3–6 for Osterøy i seriepremieren i 4. divisjon på Øystese stadion, medan B-laget tapa 1–5 for Bergen Nord i divisjonen under i grannebygda.
Det aller fyrste målet for samarbeidslaga stod Anders Botnen for. Han sette like godt to ballar til i nettet då han fyrst var i siget. Halvvegs i kampane låg laga under med høvesvis 1–4 og 0–5. Dei lokale heltane heva seg med andre ord etter pausen. For B-laget sytte Sigurd Stevnebø Kaale for at heimelaget faktisk vann den andre omgangen med 1–0.
Kampen i Øystese vart avbroten ei god stund då ein Osterøy-spelar vart liggjande urørleg. Medisinsk kompetanse som var til stades på kampen, kom raskt til. Vedkomande vart frakta bort med ambulanse.
Både A- og B-laget stilte med unge lag prega av unge, lokale spelarar og elevar ved Framnes Kristne Vidaregåande Skule. B-laget hadde nokre veteranar i bakhand på benken.
