Tilreisande sikta best

Vossing Oddbjørn Norekvål vann elgbanestemnet i Vangdalsåsen laurdag.

Tevlinga trekte 11 deltakarar til den nye banen. Vossingen, som representerer det aktive jeger- og fiskarlaget i Åsane, presterte 83 av 100 poeng og vart suveren vinnar totalt. Også på 2.-plass kom ein kar frå Åsane, nemleg veteran Torgeir Strand. Slik høyrdest det vel å merka ikkje ut etter skytinga.

– Så dårleg har eg aldri skote! sa Strand etter ti skot og 21 av 50 poeng på den «springande» elgen.

Beste kvemming var ein av arrangørane i Øystese jeger- og fiskarlag, Hallgeir Botnen, som fekk 68 poeng og kom på 4.-plass.

Skyttarane skyt på både elg som står i ro og elg med ei løpetid som varar i om lag 4,5 sekund kvar veg. På den tida legg elgen tilbake 23 meter. Morten Laupsa-Borge fortel at øvinga er så krevjande at det krevst regelbunden trening for å meistra henne godt.

Skyttarane kan velja om dei vil sikta på ein siktefigur som er plassert 63 centimeter til sides for midten av blinken. Skyt dei der med våpen av grovt kaliber, skal dei normalt treffa i midten. Alternativet er å gjera det som er vanleg i meir tradisjonell jakt, nemleg å lata siktet «passera» dyret og fyra av i rette augneblink. Denne metoden gjev meir realistisk jakttrening, fortel Laupsa-Borge.

Skyttarane skyt fire seriar på fem skot, ti skot på stilleståande elg og ti på løpande elg Stillingane avheng av kva klasse dei er i. Maksimal poengsum per skot er fem og maksimal totalsum dermed 100 poeng.

Kvar måndag og torsdag i august skipar Øystese jeger- og fiskarlag til elg- og jegerskyting i Vangdalsåsen, med måndag 30. august som siste høve til å ta storviltprøven.