Testa golfkøllene

– Det er kjekt å oppleva meistring. Sjølv om det ofte ikkje er meistring.

Golfbanen på Børve opna for publikum onsdag, etter å ha vore stengd i ei veke.

I god koronastil var det lang avstand mellom spelarane, men det var altså fleire som kjende på kallet i finvêret og på fridagen fredag.

Linn Haugsland Ur og Lars Ese Ur er to av dei. Dei tok i fjor vår «vegen til golf»-kurset hjå Hardanger Golfklubb. No gjeld det å sjå om det dei lærte, sit.

Godt å komma seg ut

Treningsfeltet er framleis stengt, så ein får ikkje trent berre på slaga.

– Å byrja rett på banen etter eit halvt år, er utfordrande, men kjekt. Ingen av oss har spelt golf før i fjor. Det er kjekt å prøva noko heilt nytt, heilt frå «scratch», og oppleva litt meistring. Sjølv om det ofte ikkje er meistring. Men dei gongane det sit, er det kjekt, seier Linn Haugsland Ur.

– Eg er på tredje ballen no, vedgår Lars Ese Ur.

– Det har gått betre enn me trudde, men eg har ikkje særleg kontroll. Ballen kan gå kvar som helst, eigentleg. Men det er godt å komma seg ut. Det er så fint her oppe, med god utsikt, lite folk og frisk luft, seier Haugsland Ur.

Det er kombinasjonen av mosjon, å finna på noko i lag og å treffa på kjekke folk som gjer golfen kjekk, seier dei.

Det er rett nok mindre – eller i alle fall færre – kjekke folk på banen denne koronalangfredagen.

Annleis påske

Elles har familien Ur brukt mykje av ferien ute i hagen. Bålpanna har vore meir i bruk enn nokosinne. Dei har dessutan gått nokre turar i nærmiljøet.

Den tradisjonelle påsketuren til Ryfylke, der båe to er frå, måtte gå ut frå programmet. Vanlegvis samlast storfamilien til grilling og påskeeggjakt påskeaftan og påskedag.

– Å finna golfballar som hamnar i skogen, er god trening til å leita etter påskeegg, seier Ese Ur.

I staden har familien hatt ein roleg påske heime. Ein påskekurv frå Hardangerfjord Hotel, som tok mot tingingar og leverte ut maten onsdag, kom godt med.

– Me er takksame for å ha hage og stort hus, og at me er fleire. Borna har kvarandre, på godt og vondt, seier Haugsland Ur.