Tek stilling til tennistomt

Ei høyring blant medlemene tyder på at valet fell på Vik. Idrettslaget sende denne veka innspel til kommuneplanen for Ullensvang om den ynskte tennisbanen.

I spørjegranskinga tok mange til orde for at hallen bør plasserast meir sentralt og nærare skulen enn på ballbanen i Sætveithagen, som var den føreslegne lokaliseringa. Det einaste realistiske alternativet ligg mellom Viketunet og fylkesvegen i Vik, meiner idrettslaget. Området er landbruksareal, men vert nytta og stelt som park.

I innspelet er ein bane med lengd på nær 37 og breidd på 17 meter teikna inn. Kring han bør eit gjerde på inntil tre meter skjerma. Planen er å nytta eit hybriddekke med raud kunstgrus som er nær vedlikehaldsfritt og sikrar god drenering.

– Både for skulen, for lokalsamfunnet og for Jondal som ein attraktiv stad å flytta til vil ein tennisbane vera eit stort pluss. Og plassert slik som vist vil banen vera eit godt supplement til det som alt er av idretts- og trimanlegg konsentrert i Vik, skriv leiar Gudmund Toreid i innspelet.

Han påpeikar at uteområdet ved skulen kan supplera tilbodet med anlegg for friidrett og basketball.

– I sum vert dette ein konsentrasjon av flotte anlegg som kven som helst elles vil måtta misunna oss, skriv Toreid.

I oktober bad idrettslaget om areal til padeltennishallen mellom kunstgrasbanen og Fjøringen.