Tek granulatureining på alvor
Kunstgrasbanane i Kvam skal verta meir miljøvenlege. I 2023 har er det sett av fleire hundre tusen kommunale kroner til føremålet.
Gummigranulat frå kunstgrasbanar fører ifølgje Miljødirektoratet til at mange tusen tonn plast finn vegen ut i naturen kvart år. Ei ny forskrift med strenge krav vart innført i juli 2021.
Representantar for Hordaland fotballkrins har vore på synfaringar på fleire banar i Kvam. Konklusjonen er at det står mykje att før dei lokale banane stettar krava.
Plasserte i pott
For å bøta på dette, har Kvam herad i sett av 400.000 kroner i år og neste år til miljøtiltak på dei to kommunale banane i Tørvikbygd og ved barneskulen i Øystese. I heradsstyremøtet 8. desember bestemte politikarane at det i tillegg skulle setjast av 600.000 kroner til banane lag og organisasjonar eig.
Ifølgje leiar for samfunn, næring og kultur i Kvam herad, Jon Nedkvitne, er pengane plasserte i ein pott baneeigarane kan søkja om stønad frå. Fristen for å søkja om tilskot er 1. mars.
Filter og børstar
Det er ikkje konkrete planar for korleis pengane til dei kommunale banane skal brukast.
– Me har ikkje ei liste over tiltak, men må sjå på banane og sjå på kva som må gjerast for at dei skal tilfredsstilla forskrifta, seier Nedkvitne.
Han fortel at hovudårsakene til at granulat endar i naturen, er at granulata blir skylde av banane via dreneringssystemet og at dei følgjer med brukarane av banen.
– Då vert god filtrering av dreneringssystemet viktig. Samstundes vert det viktig å plassera rister og børstar ved inngangane til banene, slik at brukarane kan børsta av seg granulata på veg ut, seier Nedkvitne.
Fotballforbundet tilrår informasjonsskilt ved alle banar som seier kva brukarane bør gjera for å unngå å få med seg granulat av banen. Dette er òg noko som kan verta prioritert, fortel Nedkvitne.
