Teigland nominert til pris
Arne-Kristian Glück-Teigland, sørpolfarar frå Øystese, er nominert til prisen årets eventyrar 2022.
Prisen vert delt ut under Eventyraften i Chateau Neuf i Oslo 27. januar 2023.
Teigland er ein av åtte nominerte norske friluftsentusiastar.
– Målet med heidersprisen er å bidra til å realisera store og små turprosjekt og anerkjenna ein eller fleire personar som har vore på sitt livs største eventyr – og som har utfordra seg sjølv i naturen, skriv arrangørane.
Teigland og turkompis Kjartan Bergsvåg går på vegner av Fridtjof Nansen, som ynskte å gå til Sørpolen, men som aldri kom dit.
– Eg har stor sans for å dra opp historiske liner i notida. Fridtjof Nansen er eit ideal – den unge, ambisiøse og uredde friluftsmannen som planla og gjennomførte store bragder. På overvintringa på Frans Josefs Land med Hjalmar Johansen drøymde han om Sørpolen, men historia ville det diverre annleis for polfararen. Desse draumane vil eg og kompisen min realisera på vegner av Nansen ved å gå til Sørpolen i 2022, seier Teigland til arrangørane av Eventyraften.
På heimesida til arrangementet kan ein stemma på dei nominerte. Kvemmingen var nominert også i fjor.
Les også:
