Tapa på heimebane, men har tru på god sesong

Motstandar Odda, som er divisjonskollega i 4. divisjon, vart for sterk og vann kampen 1–0 etter eit mål få minutt før slutt. Trenar Denis Ljubovic er likevel relativt nøgd.

– Kampen vart som venta. Me mangla åtte spelarar og stilte med ei blanding av A- og B-lagspelarar. Likevel såg eg mykje positivt i det spelarane gjorde. Odda stilte med eit toppa lag. Eg trur me hadde vunne om me hadde gjort det same, seier han.

Kampen mot Odda var den fjerde treningskampen i år. Tidlegare i vinter har laget spela 2–2 borte mot Lyngbø, slått Fana 2 2–1 og vunne 7–1 over Sogndal 3.

Ungt lag

Herrelaget til Øystese har dei siste åra hatt mange spelarar som har pendla frå Bergen. Ifølgje Ljubovic har desse slutta i klubben. Øystese/Norheimsund består av mange unge spelarar som spela for Norheimsund i fjor. Mange er elevar ved Framnes Kristne Vidaregåande Skule.

Fekk lov til mykje, men ikkje til alt

– Me har mange spelarar som er 17, 18 og 19 år. Det kan vera ei utfordring. Dei unge treng erfaring og folk med erfaring rundt seg. Divisjonen består av mange «krigarlag» med vaksne og fysisk sterke spelarar. Me i trenarteamet jobbar med å gjera dei unge spelarane klare for dette, seier han.

Anders Næs var i ein kort periode assistenttrenar for Øystese/Norheimsund og trenar for B-laget Norheimsund/Øystese 2. På grunn av jobb i Bergen måtte han trekkja seg frå verva. I staden har Christian Kjosås teke over oppgåvene. Han har ansvaret for B-laget saman med Eivind Madsen Skeie. Ljubovic seier Næs framleis er registrert som spelar i klubben og Ljubovic håpar Næs i alle fall kan spela i nokre av kampane. Både Ljubovic og Kjosås var spelarar i fjor. Ljubovic utelukkar ikkje at dei kan verta å sjå på banen i år òg.

– Eg trur Christian er klar dersom det bruk for han. Sjølv vurderer eg om eg skal satsa som spelar i år. Det er på tide å byrja trena om eg skal vera klar til seriestarten, seier han.

– Skal vera klare

For Øystese/Norheimsund startar alvoret fredag 14. april. I den første kampen møter laget Osterøy i Øystese.

Ljubovic fortel at den største utfordringa i sesongførebuinga har vore vêret. Kulde og snø har gjort at det har vore lite trening ute.

– Det er veldig fint på kunstgrasbanen i Framnes Arena, men den har ikkje plass til å spela meir enn seks mot seks. Me har fått litt lite trening i å spela på stor bane, seier han.

Ljubovic seier han var usikker på korleis det kom til å verta å få spelarar frå to lag til å fungera saman.

– Det har ikkje vore noko problem. Det er mange lokale spelarar i laget, og stemninga i garderoben er god. Spelarane kosar seg saman. Får me jobba godt dei siste vekene før seriestarten, er eg sikker på me skal vera klare, seier han.

Ønskjer å variera

Treningskampen mot Odda vart spela på kunstgrasbanen i Norheimsund. Klubbleiingane ønskjer at samarbeidslaga skal variera mellom å spela kampar i Norheimsund og Øystese. Det har fotballkrinsen enno ikkje gått med på. Klubbane har klaga på vedtaket, men har ikkje fått svar.

– Eg tykkjer det kan vera ein god ide å variera mellom å spela på dei to banane. Eg trur det kan løna seg å spela mot dei beste laga i Øystese, sidan banen der er smalare enn banen i Norheimsund, seier Ljubovic.

Øystese/Norheimsund ønskjer å spela éin treningskamp til før sesongen startar. Ljubovic fortel at laget har ein avtale om å spela ein kamp til mot Odda. Truleg vert kampen spela i Odda. Datoen er ikkje klar.