Tapa mot topplag

Bortelaget vann kampen 3–0 (25–17, 25–16, 23–18).

– Dette var ein frykteleg kamp av oss. Ingenting fungerte. Alt frå grunnspelet til mottaka svikta. Me gjorde feil val, var dårlege i angrep og ikkje påskrudde i forsvaret. Rett nok møtte me eit av dei beste laga i divisjonen, men eg veit at me er betre enn me fekk vist i denne kampen, seier kaptein og trenar Jon Erlend Haukås.

Sjå video frå kampen her:

Han tek på seg ein del av skulda for at det vart som det vart.

– Eg har lege i senga med covid-19 heile veka. For min del var det ikkje den beste oppladinga. Det gjorde at eg var sur og gretten på banen, og det smitta nok over på resten av laget, seier han.

Kjempar i botnen

Det er 11 lag i 1. divisjon. Etter kampen ligg Rossvoll på 8.-plass. Dei to nedste rykkjer ned til 2. divisjon. Toppvolley Norge 2, som ligg nest sist, kjem frå ein toppidrettsskule som spesialiserer seg på volleyball, og kan ikkje rykkja ned. Det betyr at Rossvoll i dag ligg på plassen over nedrykksplass.

– Eg trur moglegheitene for å unngå nedrykk er gode. Me har møtt dei beste laga allereie og har mange gunstige kampar att. Eg trur me skal overleva, men me må skjerpa oss, seier Haukås.

Tok ein alvorsprat

Haukås er overraska over at laget kjempar i botnen.

– Me har mange gode spelarar, og eg trudde me skulle kjempa blant dei fem beste. Problemet har vore dårleg frammøte på treningane. Folk har ikkje trena godt nok, fortel han.

Like etter nyttår hadde laget eit oppvaskmøte.

– Eg gjorde det klart at anten stiller dei på trening minst to gonger i veka, eller så er det slutt. Etter jul har me heva oss. Eg ser at folk er skikkeleg gira på å trena. Når treningsgrunnlaget vert betre, vert nivået høgare. Me spela mellom anna veldig bra då me i førre runde vann 3–1 borte mot Sotra VBK, seier Haukås.

Skuffa over heimeform

Den dårlege heimeforma er det som har skuffa Haukås mest denne sesongen.

– Publikum har vore veldig flinke til å møta opp. Likevel har me ikkje levert. Det er eg lei meg for. Me vil så gjerne gje noko attende til publikum når dei gidd å bruka tid på oss. Eg håpar folk held fram med å koma, så lovar eg at me skal ta eit tak og byrja prestera, seier han.

Rossvoll har åtte kampar att å spela. Neste kamp kjem på laurdag, då laget skal spela borte mot Sandnes VBK.