Tapa den fyrste heimekampen
Eliteserielaget til Hardanger Bordtennisklubb spela på heimebane sundag. Det gjekk ikkje så bra.
Bortelaget Laksevåg bordtennisklubb vann kampen 6–0. Sportsleg leiar Håvard Markhus i heimeklubben fortel at resultatet ikkje var uventa.
– Laksevåg er eit av topplaga i divisjonen. Dei to første singelkampane var veldig jamne. Med litt flaks kunne me ha leia 2–0. Marginane er små, men det beste laget vann, seier han.
– Har trua
Kampen mot Laksevåg var den 3. kampen eliteserielaget til Hardanger spela denne helga. Laurdag var laget i Olsvikhallen i Bergen og spela 2 kampar. Det enda med tap mot både Fokus bordtennisklubb og B-72.
Eliteserielaget til HB har berre teke 1 poeng denne sesongen. Etter 7 kampar ligg laget sist i divisjonen.
– Me visste før sesongen at dette kom til å bli ein utfordrande sesong. No er me halvvegs. Eg trur kampane som står att, er lettare enn dei me har spela til no. Målet er at eliteserielaget held seg i divisjonen. Det vert ikkje enkelt, men det er framleis fullt mogleg, seier Markhus.
Kos etter kamp
Om lag førti personar hadde møtt opp for å sjå kampen i Norheimsund idrettshall. Dei aller fleste er medlemer i HB. Etter kampen fekk dei yngste spela mot eliteseriespelarane i klubben. Det vart servert kaker, pizza og andre godsaker.
– Det som skjedde etter kampen, er på mange måtar like viktig som sjølve kampen. Me fekk samla topp og breidde, og folk fekk kosa seg saman. Det var veldig god stemning. Dessutan trur eg det er motiverande for unge spelarar å prøva seg mot dei beste, seier Markhus.
