– Tap, men god dugnadsånd
Norheimsund Fotballklubb gjekk med underskot, men er nøgd med dugnadsinnsatsen.
Klubben fekk ein meir normal sesong etter at koronasmitteverntiltaka vart oppheva 12. februar 2022. Det går fram av årsmeldinga.
Fotballklubben hadde eit underskot på 147.000 kroner. Straumutgiftene var store, og dei nye draktene vart ikkje sponsa. Lønsutgiftene er dei same som før, men auka samanlikna med koronaåra. Klubben har slite med manglande innbetalingar, og er no betre til å purra med ein gong fristen er ute. Det er dyrare å driva no enn før, så styret må ta ein runde med inntekter, utgifter og sponsorar. Ein freistar å halda treningsavgiftene på same nivå som Øystese Fotballklubb, skriv klubben. Driftstilskotet frå Kvam herad er framleis 80.000 kroner, som det har vore i mange år, og klubben vil gjerne auka det, ifylgje årsmeldinga.
Dei største driftskostnadene var løn utan arbeidsgjevaravgift på 335.000 kroner, lys og varme på 231.000 kroner og løn til tilsette på 217.000 kroner. Vedlikehald av banen kom på 165.000 kroner. Samla driftskostnader kom på 2,0 millionar kroner.
Dei største inntektene i 2022 var ålmennyttige tilskot på 387.000 kroner, sponsorinntekter på 293.000 kroner og treningsavgifter på 262.000 kroner. Medlemskontingentane bidrog med 85.000 kroner. Samla driftsinntekter var 1,8 millionar kroner.
Klubben hadde ein liten auke i medlemstalet i fjor, og hadde ein ryddejobb i medlemslista.
Avtalen med Øystese Fotball vart underskriven 4. september, med A-laget Øystese/Norheimsund i 4. divisjon og B-laget Norheimsund/Øystese i 5. divisjon.
Klubben har vore heldig med trenarar, og foreldra er flinke til å stilla opp. Eidfjord Cup var ei vellukka turnering, med over 200 spelarar og foreldre på tur. Dei fleste laga i klubben deltok på Walter Holmes Cup i Ålvik og Øystese Cup. På Tine Fotballskule 8.–10. august deltok 120 born.
Klubben har investert i nytt lydanlegg med hjelp av tilskot. Det har òg vore gode dugnader, med mange frammøtte. Klubben har «endeleg» fått innkjøpt hjartestartar, sponsa av Sparebanken Vest. Torgdagen gav ei god inntekt og vart eit fint arrangement etter nokre stille år. Elles prega arbeid med Haugamyr-prosjektet året, og klubben har teke opp eit lån på 2,5 millionar kroner til mellombels finansiering.
