Sysken i skyting

Syskena er nett ferdige med å skyta på miniatyrbanen i Vangdalsåsen, men etter at dei har pakka skytekleda i bagen, har dei tid til ein kort prat med HF før ferja går over fjorden til Jondal.

Dei to fortel til HF at dei ikkje er så glade i fotball, og då er det ikkje all verda av andre fritidstilbod å velja mellom i nærområdet. Alternativet er å køyra den lange vegen frå Indre Alsåker til Odda.

Over Åsleite

Då Tuva fekk ein lapp på skulen med informasjon om skytetilbod på Aga for om lag fire år sidan, enda det med at syskena i staden reiste til Jondal for å prøva seg. Seinare har også ei yngre syster på ni år hive seg med i nybyrjarklassen.

— Det er veldig kjekt å koma til Jondal, seier Tuva, som seier at syskena får god hjelp av jondølingane på trening kvar tysdag.

No reiser bror og syster på stemne både her og der i regionen, gjerne med pappa Kjetil eller bestefaren som sjåfør. Til Vangdalsåsen var mor med. Syskena reiste heim att med 341 poeng og 314 poeng i bagasjen. Konkurransen i dei to rekruttklassane er tøff, så nokon siger vart det ikkje denne gongen.

Båe syskena seier at dei får meistringskjensle av å skyta.

— Og så er det jo gøy, då, seier Torstein.

Wikane og Øye vann

Fleire lokale skyttarar vart landsdelskrinsmeister. Kristine Solheim Wikane frå Jondal vann juniorklassen med 340 poeng, etter solide 148 poeng på dei fyrste 15 skota. Nummer 2 og 3 fekk 339 poeng.

Henry Øye frå Hardanger klinka til med 348 poeng og 20 innertiarar i V55. Resultatet heldt til siger. Kjartan Huldal frå Åsane/Hordvik fekk same sum, men 3 færre innerblinkar. Magne Lysen frå Hardanger enda på ein delt 3.-plass med 346 poeng i ein klasse med 24 deltakarar.

I klasse 2 var 2 Hardanger-skyttarar best. Bjarte Måkestad vann med 342 framføre Ann-Kristin S. Bråten med 341 poeng.

I klasse eldre rekrutt vart Jonas Bjørke nummer 2. Med 348 poeng var han like god som vinnar Nora Aadland Flatås frå Stord, men hadde 4 færre innertiarar. 11 deltok. I rekruttklassen vart Ella Måkestad nummer 3 av 9 etter å ha skote 336 poeng.

I klasse 3—5 trekte Lise Margrethe Rinde frå Åsane/Hordvik det lengste strået, etter å ha prestert 346 poeng i det aller siste laget. 2 andre hadde same sum. Beste lokale helt var Kjetil Skår frå Hardanger med 344 poeng og 7.-plass.

I samlagsskytinga var Hardanger og Voss best både senior-, veteran- og ungdomsklassen. I seniorklassen var Bjarne Sollesnes, Harald Brekke, Liv Sollesnes og Kjetil Skår 1 poeng betre enn Hordaland.

Smitteprega stemne

235 skyttarar var påmelde til landsdelskrinsstemnet. Leiar Arve E. Kolltveit i arrangørlaget Hardanger opplyser at særleg covid-19 førte til ei lang rekkje forfall, spesielt i dei yngste klassane.

For å ta omsyn til eventuelle smittevernrestriksjonar, var stemnet på førehand spreidd over tre dagar — tysdag, torsdag og laurdag. Dessutan vart det ikkje avvikla finalar til slutt; alle fyrte av 35 skot med det same dei var i elden.

No går skytinga, som det meste anna i samfunnet, for full rulle igjen. Skyttarlaga har ikkje vore dei verst råka av smitteverntiltak, men har ført til periodar utan organisert trening og konkurransar. Det har vore ganske få på treningane i mykje av det siste året, fortel veteran Arne Berge, som med 349 poeng for ein gongs skuld måtte nøya seg med 3.-plass i klasse V73 i helga.

Han og veterankollega Sverre Måkestad fortel at det har minka ein del på ungdomane på onsdagstreningane samanlikna med tida før pandemien. Vona deira er at det tek seg opp att no som situasjonen har normalisert seg.

I papiravisa tysdag 22. februar er det opplyst at Kjetil Måkestad vann klasse 2. Det korrekte er Bjarte Måkestad. Red.