Sykla til Voss og heim att
Torgeir Kinne Solsvik var den raskaste av alle deltakarane på strekninga Norheimsund–Voss. Etter målgang snudde han like godt og sykla heim.
Vossevangen var full av trøytte syklistar laurdag etter kvart som deltakarane frå sykkelritta Bergen–Voss og Norheimsund–Voss byrja koma i mål. Solsvik var ikkje blant dei trøyttaste. Alt han trong, var eit måltid før han var klar til å sykla tilbake til Kvam.
– Det gjekk heilt fint. Eg tok det meir med ro på heimvegen. Eg er van med å sykla såpass lange etappar når eg trenar, fortel han.
– Ein fin tur
Solsvik fortel at han har delteke i Bergen–Voss fleire gonger. I år høvde det ikkje å vera med. Kvelden før rennet kjende han likevel kløa i pedalføtene og bestemte seg for å melda seg på Norheimsund–Voss.
– Skal du sykla Bergen–Voss, må du vera førebudd. Du må stå grytidleg opp og reisa til Bergen. Det høvde ikkje for meg denne gongen. Som deltakar i Norheimsund–Voss fekk eg god tid om morgonen før rittet, fortel han.
Turen til Voss omtalar han som fin.
– Eg kjende fort at forma var god og gav det eg hadde. Det var kjekt å koma i mål på toppen av resultatlista for ein gongs skuld, sjølv om rittet kanskje er mindre prestisjefylt enn Bergen–Voss, fortel han.
Fleire frå Kvam
Solsvik, som representerte Hardanger Sykkelklubb, fullførte på tida 2.20.27. Nestemann på resultatlista var Amund Leiren, også han frå Kvam, som kom i mål på 2.33.06. Leiren representerte ikkje ein klubb.
John M. Tveit, som sykla i klassen for menn mellom 70 og 74 år, kom på 10.-plass med tida 3.24.44.
Sju syklistar frå Hardanger Sykkelklubb stilte på startstreken i Bergen–Voss. Den raskaste av dei var Stig Byrkjeland, som med tida 4.33.55 kom på 92.-plass i herreklassen. Han kom i mål 37.47 minutt bak vinnaren. Byrkjeland var den einaste frå Hardanger Sykkelklubb som var blant dei hundre raskaste.
– Fin utvikling
Nils Olaf Solberg er dagleg leiar i arrangørklubben Bergen Cykleklubb. Han opplyser at årets utgåve av Bergen–Voss var den 47. i rekkja.
Som så mange andre sportsarrangement sleit Bergen–Voss sleit med få deltakarar under pandemien. Difor tykkjer Solberg det er gledeleg at Bergen–Voss i år hadde 40 prosent fleire deltakarar enn i fjor.
– Me føler me er på rett veg og gler oss allereie til neste år, skriv han.
