Susa inn til pallplass

Då Tertnes Alpin arrangerte krinsmeisterskap i U8-U16 i alpint i Eikedalen, stilte to kvemmingar til start. Systrene Erika og Aina Sørheim Almeland deltok i klassen U12.

Saman med samningane

Laurdag vart det ein 2.-plass på Aina og ein 4.-plass på Erika i storslalåm. Sundag stod slalåm for tur. Då tok Erika 2.-plassen, medan Aina enda på 3.-plass.

Dei to systrene, som går i 6. klasse, køyrer for Samnanger IL av di Kvam ikkje har nokon aktiv alpinklubb, opplyser Stian Kreken Almeland, som er far til dei to unge alpinistane.

Også veslesyster Åsta (6) og klasseveninne Ida Gjerde Rykkje er med på laget.

To gonger i veka trenar dei ivrige alpinistane frå Kvam på både fart og teknikk i skiløypene i Eikedalen saman med samningane. Av og til kan det verta ei ekstra økt i helgene òg.

— Godt integrerte

Ifylgje Almeland er 6.-klassingane snart ferdige med sin tredje sesong. Han opplever at dei har vorte godt integrerte i samnangerklubben.

— Den fyrste sesongen var nok alt litt skummelt og nytt, men no har dei stifta mange nye venskap og vert godt varetekne, fortel han.

I tillegg til dei faste treningane er jentene med på samlingar både med laget og skikrinsen i Hordaland. Det er ifylgje Almeland med på å skapa samhald i både klubben og på tvers av klubbane.

— Samlingane som vert arrangerte i desember og januar, er ein fin start på sesongen, seier han.

Til helga reiser systrene til Ål for å køyra mot alpinistar frå ulike delar av landet. Då står super-G, storslalåm og slalåm på programmet.