Strandebarmheimen deltek i verdsmeisterskap
Den som vitjar Strandebarmheimen, kan verta møtt av synet av bebuarar som sit på rekkje og rad og trakkar taktfast på pedalar.
Årsaka er at dei deltek i sykkel-VM for eldre frå 3. til 28. oktober, fortel fysioterapeut Rikke Gjerde Reistad.
Bebuarane brukar trimsyklar og pedaltrenarar med kilometerteljarar, og målet med konkurransen er å sykla så langt som mogleg. Dei tilsette noterer kor langt kvar deltakar syklar og sender informasjonen til arrangøren. Det vert tevla både i ein herreklasse, ein dameklasse og ein lagklasse.
Fem tusen deltakarar
Over to hundre lag og nesten fem tusen syklistar frå institusjonar i sju land deltek. Alle som deltek, får premie, medan det vert ekstrapremiar til alle som får ei pallplassering. Då HF vitja Strandebarmheimen onsdag 19. oktober, låg laget på 43.-plass.
Reistad seier at deltakarane samlast to–tre gonger i veka for å sykla saman. I tillegg tek mange daglege ekstraøkter åleine.
– Mange syklar mellom fem og ti kilometer kvar dag. Den mest ivrige syklar 20 kilometer kvar dag, fortel ho.
Syner sykkelfilm
For å gjera all trakkinga meir interessant, nyttar ein eit program utvikla av verksemda Motiview. Programmet gjer det mogleg å visa film som gjev inntrykk av at ein glir gjennom terrenget. Det finst filmopptak frå mange land over heile verda. Motiview har òg laga eigne opptak frå Kvam.
Sykkel-VM for eldre vart starta av Motiview i 2017. Strandebarmheimen har delteke tidlegare.
Sjølv om fleire institusjonar i Kvam nyttar programvara for å motivera brukarane til å sykla meir, kjenner ikkje Reistad til at andre institusjonar i Kvam har vore med i konkurransen.
Fysikk og fellesskapskjensle
Reistad meiner at det er fleire fordelar med å delta. Den mest opplagde er at det er sunt med fysisk aktivitet.
– Fleire har sagt til meg at dei kjenner at det gjer godt for kroppen at dei syklar. Men dette er også sosialt. Gjennom filmane får bebuarane oppleva både stader dei har vitja tidlegare og heilt nye stader. Dette gjev dei noko å snakka om. Dessutan trur eg dei får ei kjensle av fellesskap når dei syklar saman og tevlar saman som eit lag, seier ho.
Når VM er over, vert det feiring med medaljeutdeling til deltakarane.
